ഡോ വന്ദനയ്ക്ക് സുരക്ഷയൊരുക്കുന്നതില്‍ മുഴുവന്‍ സംവിധാനങ്ങളും പരാജയപ്പെട്ടു; വിമര്‍ശനവുമായി ഹൈക്കോടതി

കൊച്ചി: കൊട്ടാരക്കര താലൂക്ക് ആശുപത്രിയില്‍ യുവ ഡോക്ടര്‍ വന്ദന ദാസ് കൊല്ലപ്പെട്ട സംഭവത്തില്‍ രൂക്ഷവിമര്‍ശനവുമായി ഹൈക്കോടതി. സംവിധാനത്തിന്റെ പരാജയമാണ് ഉണ്ടായിരിക്കുന്നതെന്നും വിഷത്തെ ന്യായീകരിക്കാനാവില്ലെന്നും കേസ് പരിഗണിക്കവെ ഹൈക്കോടതി പറഞ്ഞു.

ഒറ്റപ്പെട്ട സംഭവമെന്ന് പറഞ്ഞ് തള്ളിക്കളയരുത്. സംവിധാനങ്ങളുടെ പരാജയമാണ്. പ്രതിയുടെ പെരുമാറ്റത്തില്‍ പ്രകടമായ വ്യത്യാസമുണ്ടായിരുന്നെന്ന് പൊലീസ് തന്നെ പറയുന്നു, അങ്ങനെയെങ്കില്‍ എന്തിനാണ് പൊലീസുകാരുടെ കാവലില്ലാതെ ഡോക്ടറുടെ മുന്നിലേക്ക് സന്ദീപിനെ എത്തിച്ചതെന്ന് കോടതി ചോദിച്ചു.

അതേസമയം, പൊലിസ് മേധാവി ഓണ്‍ലൈനായി കോടതിയില്‍ ഹാജരായിരുന്നു. കോടതിയില്‍ പവര്‍പോയിന്റ് പ്രസന്റേഷന്‍ വഴിയാണ് എന്തുസംഭവിച്ചുവെന്ന് എ.ഡി.ജി.പി വിശദീകരിച്ചത്. അക്രമിയെ പ്രതിരോധിക്കാനായി പൊലിസിന്റെ കൈയ്യില്‍ ആയുധങ്ങളൊന്നും ഉണ്ടായിരുന്നില്ലെന്നും പൊലിസ് അറിയിച്ചു.

ആശുപത്രിയില്‍ ഏതാണ്ട് നാലുമിനിറ്റുകൊണ്ടാണ് എല്ലാ സംഭവങ്ങളും ഉണ്ടായതെന്ന് പൊലീസ് വ്യക്തമാക്കി. ഇത്തരം സംഭവങ്ങള്‍ കൈകാര്യം ചെയ്യുന്നതിന് ഒരാഴ്ചക്കുള്ളില്‍ പുതിയ പ്രോട്ടോകോള്‍ ഉണ്ടാക്കുമെന്ന് പൊലീസ് അറിയിച്ചു. ആശുപത്രിയില്‍ ഉള്‍പ്പെടെ പോലിസ് സേവനം ഉറപ്പാക്കുമെന്നും എ.ഡി.ജി.പി ഹൈക്കോടതിയില്‍ വ്യക്തമാക്കി.