ന്യൂഡല്‍ഹി: ഗര്‍ഭിണികള്‍ക്കും വാക്‌സിന്‍ നല്‍കണമെന്ന ആവശ്യവുമായി ആരോഗ്യ വിദഗ്ധര്‍ രംഗത്ത്. രണ്ടാം തരംഗത്തില്‍ ഗര്‍ഭിണികളുടെ മരണ നിരക്ക് ഉയരുന്നുവെന്നും ഇത് ആശങ്കക്കിടയാക്കുന്നുവെന്നുമെന്നാണ് ആരോഗ്യ വിദഗ്ധര്‍ പറയുന്നത്. ഇക്കാര്യം ചൂണ്ടിക്കാട്ടി ഗൈനക്കോളജി ഫെഡറേഷന്‍ കേന്ദ്രത്തിന് കത്തച്ചു.

രണ്ടാം തരംഗത്തില്‍ രണ്ട് മാസത്തിനിടെ കേരളത്തില്‍ മാത്രം 37 ഗര്‍ഭിണികള്‍ മരിച്ചതായി കത്തില്‍ ചൂണ്ടിക്കാട്ടുന്നു. ഏപ്രില്‍ മെയ് മാസത്തെ മാത്രം കണക്കാണിത്. ആദ്യ തരംഗത്തില്‍ ഒരു വര്‍ഷത്തിനിടെ ഏഴ് ഗര്‍ഭിണികളാണ് മരണത്തിന് കീഴടങ്ങിയിരുന്നത്.

കോഴിക്കോട് മഞ്ചേരി പരിയാരം മെഡിക്കല്‍ കോളജിലെ കണക്കനുസരിച്ച് കൊവിഡ് ബാധിച്ച് വന്ന ഗര്‍ഭിണികള്‍ പലരും ന്യൂമോണിയ ഉള്‍പെടെ ഗുരുതരമായ അവസ്ഥയിലായിരുന്നുവെന്നും കത്തില്‍ ചൂണ്ടിക്കാട്ടുന്നു. കുട്ടികളെയാണ് കൂടുതലായും ബാധിക്കുകയെന്ന് പറയുന്ന മൂന്നാം തരംഗം മറികടക്കാന്‍ ഗര്‍ഭിണികള്‍ക്കും വാക്‌സിന്‍ നല്‍കേണ്ട ആവശ്യമുണ്ടെന്നും ഫെഡറേഷന്‍ ചൂണ്ടിക്കാട്ടുന്നു.