ജയ്പൂർ
പ്രവാചകനെ നിന്ദിച്ച് ബി.ജെ.പി വക്താവ് നൂപുർ ശർമ നടത്തിയ പരാമർശങ്ങളെത്തുടർന്ന് യുവാവ് കൊല്ലപ്പെട്ടതോടെ രാജസ്ഥാനിലെ ഉദയ്പൂരിൽ സംഘർഷം വ്യാപിക്കുന്നു. നൂപുർ ശർമയെ സമൂഹമാധ്യമത്തിൽ പിന്തുണച്ച തയ്യൽ കട നടത്തുന്ന കനയ്യ ലാൽ തേലിയാണ് കൊല്ലപ്പെട്ടത്. ഇയാൾ ഏതാനും ദിവസം മുമ്പ് നൂപുർ ശർമയെ പിന്തുണച്ച് വാട്‌സ്ആപ്പ് സ്റ്റാറ്റസ് ഇട്ടിരുന്നു. ഇതേതുടർന്ന് പ്രദേശത്ത് ഇരുസമുദായങ്ങൾ തമ്മിൽ സമൂഹമാധ്യമത്തിൽ പരസ്പര വെല്ലുവിളികളും ഉണ്ടായി. ഇതിന് പിന്നാലെയാണ് രണ്ടുയുവാക്കൾ തയ്യൽ കടയിലെത്തി കനയ്യ ലാലിനെ കൊലപ്പെടുത്തിയത്. വസ്ത്രത്തിന്റെ അളവെടുക്കാനെന്ന വ്യാജേനയെത്തിയ യുവാക്കളിലൊരാൾ വിഡിയോ ചിത്രീകരിച്ച് കൊലപാതകം നടത്തുകയായിരുന്നു. നൂപൂർ ശർമയെ പിന്തുണച്ചതിനാണ് കൊലപ്പെടുത്തിയതെന്നാണ്, പിന്നീട് സമൂഹമാധ്യമത്തിൽ പങ്കുവച്ച വിഡിയോയിൽ യുവാക്കൾ അവകാശപ്പെടുന്നത്. റിയാസ്, മുഹമ്മദ് എന്നിങ്ങനെയാണ് തങ്ങളുടെ പേരുകളെന്ന് പരിചയപ്പെടുത്തിയിട്ടുമുണ്ട്. പ്രധാനമന്ത്രിക്കെതിരേ വിഡിയോയിൽ യുവാക്കൾ വധഭീഷണി മുഴക്കി.

കൃത്യം നടന്ന് മണിക്കൂറുകൾക്കകം യുവാക്കളെ അറസ്റ്റ്‌ചെയ്തതായി ഉദയ്പൂർ എസ്.പി മനോജ് കുമാർ പറഞ്ഞു. ജനങ്ങൾ സമാധാനം പാലിക്കണമെന്ന് രാജസ്ഥാൻ മുഖ്യമന്ത്രി അശോക് ഗെലോട്ട് അഭ്യർഥിച്ചു. ക്രൂരമായ കൊലപാതകത്തെ അപലപിക്കുന്നു. പ്രതികൾക്കെതിരേ കർശന നടപടിയുണ്ടാകുമെന്നും അദ്ദേഹം പറഞ്ഞു. പ്രദേശത്ത് ഇന്റർനെറ്റ് വിലക്കി.