തിരുവനന്തപുരം: മുഖ്യമന്ത്രി വാര്‍ത്താസമ്മേളനത്തില്‍ ഉന്നയിച്ച ആരോപണത്തില്‍ മറുപടിയുമായി കെ.പി.സി.സി പ്രസിഡന്റ് കെ സുധാകരന്‍. പിണറായിയെ ചവിട്ടിയെന്ന് താന്‍ പറഞ്ഞിട്ടില്ലെന്നും ലേഖനത്തില്‍ വന്നത് മാധ്യമപ്രവര്‍ത്തകനുമായി നടത്തിയ സ്വകാര്യ സംഭാക്ഷണത്തില്‍ പ്രസിദ്ധീകരിക്കില്ലെന്ന് ഉറപ്പുനല്‍കിയതിനെ തുടര്‍ന്ന് പറഞ്ഞ കാര്യങ്ങളെന്ന് സുധാകരന്‍.

പി.ആര്‍ ഏജന്‍സികളുടെ മൂടുപടത്തില്‍ നിന്ന് പുറത്തുവന്ന വിജയനെയാണ് ഇന്നലെ വാര്‍ത്താസമ്മേളനത്തില്‍ കേരളത്തിലെ ജനങ്ങള്‍ കണ്ടതെന്ന് അദ്ദേഹം കൂട്ടിച്ചേര്‍ത്തു. മുഖ്യമന്ത്രി പൊളിറ്റിക്കല്‍ ഭാഷയിലാണ് സംസാരിക്കുന്നു. ഒരു മുഖ്യമന്ത്രി സ്ഥാനത്തിന് നിനക്കുന്ന കാര്യങ്ങളല്ലെന്നും ആ നിലവാരത്തിലേക്ക് താഴാന്‍ എനിക്ക് സാധിക്കില്ലെന്നും സുധാകരന്‍ കൂട്ടിചേര്‍ത്തു.

മക്കളെ തട്ടിക്കൊണ്ടുപോകാന്‍ ശ്രമിച്ചെന്ന് പറഞ്ഞത് കളവാണ്. ഒരു ഫിനാഷ്യലാണ് ഇത്തരം കാര്യം പറഞ്ഞതെന്ന് മുഖ്യമന്ത്രി പറയുന്നു. അങ്ങനെയെങ്കില്‍ മുഖ്യമന്ത്രി ആരാണ് പറഞ്ഞതെന്ന് വെളിപ്പെടുത്തണം. കള്ളക്കടത്ത് നടത്തിയെന്ന് പറയുന്നു. അതിനും തെളിവുകള്‍ മുഖ്യമന്ത്രി കാണിക്കണമെന്നും കൃത്യമായ അന്വേഷണം നടത്തി തനിക്കെതിരെ കുറ്റം കണ്ടെത്തിയാല്‍ നടപടി സ്വീകരിക്കാമെന്നും സുധാകരന്‍ വ്യക്തമാക്കി.