ന്യൂഡല്‍ഹി: 18 വയസുകഴിഞ്ഞ എല്ലാവര്‍ക്കുമുള്ള സൗജന്യ വാക്‌സിന്‍ പദ്ധതിക്ക് ഇന്നു തുടക്കം. നേരത്തെ മുന്‍കൂട്ടി രജിസ്റ്റര്‍ ചെയ്തവര്‍ക്കു മാത്രമേ വാക്‌സിന്‍ ലഭിച്ചിരുന്നുള്ളൂ. പിന്നീട് ബുക്ക് ചെയ്യാതെ നേരിട്ട് വാക്‌സിന്‍ കേന്ദ്രത്തിലെത്തി കുത്തിവയ്‌പ്പെടുക്കാമെന്ന് കേന്ദ്രസര്‍ക്കാര്‍ തിരുത്തി. വാക്‌സിന്‍ ക്ഷാമം അനുഭവപ്പെടുന്ന കേരളത്തില്‍ മുന്‍കൂട്ടി ബുക്ക് ചെയ്യേണ്ടതില്ലെന്ന വിഷയത്തില്‍ സംസ്ഥാനസര്‍ക്കാര്‍ നിലപാട് വ്യക്തമാക്കിയിട്ടില്ല.
ഈ മാസം ഏഴിനാണ് 18 വയസിനു മുകളില്‍ പ്രായമുള്ള എല്ലാവര്‍ക്കും സൗജന്യ വാക്‌സിന്‍ നല്‍കുമെന്ന് പ്രധാനമന്ത്രി നരേന്ദ്രമോദി പ്രഖ്യാപിച്ചത്. വിവിധ ഹൈക്കോടതികളും സുപ്രിംകോടതിയും ഉയര്‍ത്തിയ വിമര്‍ശനങ്ങള്‍ക്കൊടുവിലാണ് കേന്ദ്രം വാക്‌സിന്‍നയം തിരുത്തിയത്.