വടക്കാഞ്ചേരി: കരിങ്കല്‍ ക്വാറിയില്‍ വന്‍ സ്‌ഫോടനം. തൃശൂര്‍ ജില്ലയിലെ വടക്കാഞ്ചേരി മുള്ളൂര്‍ക്കര ആറ്റൂരിലുള്ള കരിങ്കല്‍ ക്വാറിയിലാണ് സ്‌ഫോടനമുണ്ടായത്.  ഒരാള്‍ മരിച്ചു. അഞ്ച് പേര്‍ക്ക് പരുക്കേറ്റു. വടക്കാഞ്ചേരി സ്വദേശിയായ അബ്ദുല്‍ നൗഷാദാണ് മരിച്ചത്.
പാറ ഉടമയുടെ സഹോദരനാണ് അബ്ദുല്‍ നൗഷാദ്. 
15 കിലോമീറ്റര്‍ ചുറ്റളവില്‍ സ്‌ഫോടനത്തിന്റെ ശബ്ദം ഉണ്ടായെന്നാണ് ദൃക്‌സാക്ഷികള്‍ പറയുന്നത്.

സമീപത്തെ വീടുകള്‍ക്കും കേടുപാടുകള്‍ സംഭവിച്ചിട്ടുണ്ട്. ക്വാറി ഒന്നരവര്‍ഷമായി പ്രവര്‍ത്തിച്ചിരുന്നില്ല. വൈകുന്നേരം ആറുമണിക്കുശേഷമായിരുന്നു
കനത്ത ശബ്ദത്തിലുണ്ടായ സ്‌ഫോടനം. കിലോമീറ്ററുകള്‍ നീളത്തിലുള്ള ക്വാറിയാണിത്.

ഇതിന്റെ സമീപത്തെ വീടുകള്‍ക്കാണ് കേടുപാടുകള്‍ സംഭവിച്ചിട്ടുള്ളത്. ക്വാറി വീണ്ടും പ്രവര്‍ത്തനം തുടങ്ങിയിരുന്നോ എന്നറിവായിട്ടില്ല.
സ്‌ഫോടനത്തിനുശേഷം സ്ഥലത്തുണ്ടായിരുന്ന ആളുകള്‍ ഓടി രക്ഷപ്പെടുകയായിരുന്നുവെന്നാണ് ദൃക്‌സാക്ഷികള്‍ പറയുന്നത്.