ന്യൂഡല്‍ഹി: എല്ലാവര്‍ക്കും വാക്‌സിന്‍ സൗജന്യമായി നല്‍കാനുള്ള കേന്ദ്രതീരുമാനത്തെ സ്വാഗതം ചെയ്ത് പ്രധാനമന്ത്രിക്ക് നന്ദിയറിയിച്ച് കോളജുകള്‍ക്ക് മുന്‍പില്‍ ബാനര്‍ വെക്കാന്‍ യൂനിവേഴ്സിറ്റി ഗ്രാന്റ് കമ്മീഷന്‍ (യു.ജി.സി) നിര്‍ദേശം.

സര്‍ക്കാര്‍ ധനസഹായം കൈപ്പറ്റുന്ന യൂനിവേഴ്സിറ്റികള്‍, കോളജുകള്‍, ഉന്നത വിദ്യാഭ്യാസ സ്ഥാപനങ്ങള്‍ എന്നിവിടങ്ങളില്‍ ഞായറാഴ്ചയാണ് വിവിധ വിദ്യാഭ്യാസ സ്ഥാപനങ്ങള്‍ക്ക് ഇത് സംബന്ധിച്ച യു.ജി.സിയുടെ കത്ത് ലഭിച്ചത്. പതിനെട്ട് വയസിന് മുകളിലുള്ള എല്ലാവര്‍ക്കും വാക്സിന്‍ നല്‍കാനുള്ള കേന്ദ്ര സര്‍ക്കാരിന്റെ തീരുമാനത്തിന് നന്ദി അറിയിച്ചാണ് ഇതെന്നാണ് കത്തില്‍ പറയുന്നത്.

പോസ്റ്ററില്‍ പ്രധാനമന്ത്രിയുടെ ഫോട്ടോയ്ക്കൊപ്പം 'എല്ലാവര്‍ക്കും സൗജന്യമായി വാക്സിന്‍, ലോകത്തിലെ ഏറ്റവും വലിയ വാക്സിനേഷന്‍ ക്യാംപയിന്‍, നന്ദി പി.എം. മോദി'എന്നാണ് എഴുതേണ്ടതെന്ന് നിര്‍ദേശമുണ്ട്.

ഡല്‍ഹി യൂണിവേഴ്സിറ്റി യു.ജി.സി. നിര്‍ദേശം പാലിച്ച് നോര്‍ത്ത്, സൗത്ത് ക്യാംപസുകളില്‍ ബോര്‍ഡ് സ്ഥാപിക്കുമെന്നാണ് വൈസ് ചാന്‍സിലര്‍ പി.സി. ജോഷി അറിയിച്ചത്. ജാമിഅ മിലിയ യൂനിവേഴ്സിറ്റിയും ഇത്തരം ഒരു സന്ദേശം ലഭിച്ചതായി സ്ഥിരീകരിച്ചു.