മലമ്പുഴ: പാലക്കാട് മലമ്പുഴയില്‍ ഉറങ്ങിക്കിടന്ന നാലര വയസുകാരന്‍ വീടിന്റെ മേല്‍ക്കൂരയില്‍ നിന്ന് വീണ പാമ്പിന്റെ കടിയേറ്റ് മരിച്ചു. അകമലവാരം വലിയകാട് എന്‍. രവീന്ദ്രന്റെ മകന്‍ അദ്വിഷ് കൃഷ്ണയാണ് മരിച്ചത്. കുട്ടിയുടെ മൂക്കിലാണ് പാമ്പു കടിയേറ്റത്.

ശനിയാഴ്ച പുലര്‍ച്ചെയോടെയാണ് സംഭവം. ഷീറ്റിട്ട വീടിന്റെ മേല്‍ക്കൂരയില്‍ നിന്നാണു പാമ്പ് മുഖത്തു വീണത്. കുട്ടിയുടെ നിലവിളി കേട്ട് ഉണര്‍ന്ന അമ്മ പരിശോധിച്ചപ്പോഴാണ് അദ്വിഷിന്റെ മൂക്കില്‍ ചോരപ്പാടുകള്‍ കണ്ടത്. കട്ടിലിനടിയില്‍ പാമ്പിനെ കണ്ടെത്തി. വെള്ളിക്കെട്ടന്‍ ഇനത്തില്‍ പെട്ട പാമ്പാണു കടിച്ചത്.

കുട്ടിയെ ഉടന്‍ തന്നെ ജില്ലാ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കൊട്ടേക്കാട് കാളിപ്പാറ വി.കെ.എന്‍ എല്‍.പി സ്‌കൂളില്‍ യു.കെ.ജി വിദ്യാര്‍ഥിയാണ്.