എസ്.കെ.എസ്.എസ്.എഫ് സെക്രട്ടേറിയറ്റ് ധര്‍ണയില്‍ പ്രതിഷേധം ഇരമ്പി

തിരുവനന്തപുരം. മലബാര്‍ മേഖലയിലെ പ്ലസ് വണ്‍ സീറ്റ് ക്ഷാമം പരിഹരിക്കണമെന്നാവശ്യപ്പെട്ട് എസ്.കെ.എസ്.എസ്.എഫ് നടത്തിയ സെക്രട്ടേറിയറ്റ് ധര്‍ണയില്‍ പ്രതിഷേധം ഇരമ്പി. വിദ്യാഭ്യാസ മേഖലയില്‍ കാലങ്ങളായുള്ള അവഗണന അവസാനിപ്പിക്കാന്‍ മലബാറിനായി പ്രത്യേക പാക്കേജ് അനുവദിക്കണമെന്ന് ധര്‍ണ ഉദ്ഘാനം ചെയ്ത സമസ്ത എംപ്ലോയീസ് അസോസിയേഷന്‍ പ്രസിഡന്റ് മുസ്തഫ മുണ്ടുപാറ ആവശ്യപ്പെട്ടു.

തുല്യമായ നികുതി നല്‍കുന്നുണ്ടെങ്കിലും വിഭവ വിതരണത്തില്‍ മലബാറിനോടു സര്‍ക്കാരുകള്‍ തുല്യത പാലിക്കുന്നില്ല. ജനസംഖ്യ അനുസരിച്ചുള്ള അര്‍ഹമായ പരിഗണന പ്ലസ്ടു സീറ്റിന്റെ കാര്യത്തില്‍ നല്‍കുന്നില്ല. പ്ലസ് വണ്‍ പ്രവേശനത്തിന് നിലവില്‍ മലബാറിലെ അമ്പതു ശതമാനം കുട്ടികളും പുറത്താണെന്നും അദ്ദേഹം കൂട്ടിച്ചേര്‍ത്തു.

80000 സീറ്റുകള്‍ വേണ്ടിടത്ത് നാമമാത്രമായ അധിക ബാച്ചിലൂടെ 910 സീറ്റ് അനുവദിച്ചാല്‍ വിഷയം പരിഹരിക്കാനാവില്ലെന്നു മുഖ്യപ്രഭാഷണം നടത്തിയ എസ്.കെ.എസ്.എസ്.എഫ് സംസ്ഥാന വൈസ് പ്രസിഡന്റ് സത്താര്‍ പന്തലൂര്‍ പറഞ്ഞു. ഗുണനിലവാരമില്ലാത്ത ഓപ്പണ്‍ സ്‌കൂളുകളിലേക്ക് മലബാറിലെ കുട്ടികളെ തള്ളിവിടുകയാണ്. 20000 സീറ്റുകള്‍ തെക്കന്‍ ജില്ലകളില്‍ ഒഴിഞ്ഞു കിടക്കുമ്പോള്‍ വടക്കന്‍ ജില്ലകളിലെ 80000 കുട്ടികള്‍ പ്രവേശനം ലഭിക്കാതെ പുറത്തുനില്‍ക്കേണ്ടിവരുന്നെന്നും അദ്ദേഹം ചൂണ്ടിക്കാട്ടി.

എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി റഷീദ് ഫൈസി വെള്ളായിക്കോട് അധ്യക്ഷനായി. എസ്.കെ.ഐ.എം.വി.ബി എക്‌സിക്യൂട്ടീവ് മെമ്പര്‍ സഈദ് മുസ്ലിയാര്‍ വിഴിഞ്ഞം, എസ്.കെ.എസ്.എസ്.എഫ് സംസ്ഥാന സെക്രട്ടറി ഒ.പി അഷ്‌റഫ് കുറ്റിക്കടവ് എന്നിവര്‍ പ്രസംഗിച്ചു. ടി.പി സുബൈര്‍ മാസ്റ്റര്‍, നൂറുദ്ധീന്‍ ഫൈസി മുണ്ടുപാറ,ആര്‍.വി അബൂബക്കര്‍ യമാനി, സയ്യിദ് ഹുസൈന്‍ തങ്ങള്‍, ജില്ലാ പ്രസിഡന്റ് അന്‍വര്‍ ഷാന്‍ വാഫി, ജില്ലാ വര്‍ക്കിംഗ് സെക്രട്ടറി റഫീഖ് കണിയാപുരം, ജില്ലാ ട്രഷറര്‍ ഇസ്മായില്‍ ഫൈസി ബീമാപള്ളി,സുന്നി യുവജന സംഘം ജില്ലാ ജനറല്‍ സെക്രട്ടറി ഷാനവാസ് കണിയാപുരം, സ്റ്റേറ്റ് ഓര്‍ഗനൈസിങ് സെക്രട്ടറി ആലങ്കോട് ഹസന്‍, സല്‍മാന്‍ ഫൈസി തിരുര്‍ക്കാട്, നിസാം ഓമശ്ശേരി, ജുറൈജ് ഫൈസി കണിയാപുരം, പ്രവാസി നേതാക്കളായ സഈദ് തളിപ്പറമ്പ്, ഉസ്മാന്‍ പറമ്പത്ത് നേതൃത്വം നല്‍കി.