ലണ്ടൻ • മദ്യപാനം കുറച്ചാണെങ്കിൽ പോലും കാത്തിരിക്കുന്നത് രോഗങ്ങളുടെ നീണ്ടനിരയെന്ന് പുതിയ പഠനം. ഇതുവരെ അമിതമായ മദ്യപാനമാണ് അപകടം എന്ന രീതിയിലായിരുന്നു ആളുകളുടെ ധാരണ. നേരിയ തോതിൽ മദ്യം കഴിക്കുന്നത് നല്ലതാണെന്നും ചിലർ പ്രചരിപ്പിച്ചിരുന്നു. എന്നാൽ 60 രോഗങ്ങൾക്ക് മദ്യപാനം ഹേതുവാകുമെന്നാണ് ലണ്ടനിലെ ഓക്‌സ്ഫഡ് സർവകലാശാലയിലെയും ചൈനയിലെ പെക്കിങ് സർവകലാശാലയിലെയും ഗവേഷകരുടെ കണ്ടെത്തൽ.

5.12 ലക്ഷം പേരെയാണ് പഠന വിധേയരാക്കിയത്. ചൈനയിൽ കഴിഞ്ഞ 12 വർഷമായി മദ്യപാനം തുടരുന്നവരാണിവർ. മദ്യപാനികൾക്ക് 200 ഓളം വിവിധ രോഗങ്ങൾ വരുന്നതായും കണ്ടെത്തി. നാച്വർ മെഡിസിൻ ജേണലിൽ പ്രസിദ്ധീകരിച്ച റിപ്പോർട്ടിൽ 207 രോഗങ്ങളെ കുറിച്ചാണ് പ്രതിപാദിക്കുന്നത്. ഇതിൽ 61 രോഗങ്ങൾ മദ്യപാനികളായ പുരുഷന്മാരിൽ സ്ഥിരമായി ഉണ്ടാകുന്നതായും കണ്ടെത്തി.

പഠനത്തിൽ പങ്കെടുത്തവരിൽ ഭൂരിഭാഗവും പുരുഷന്മാരായിരുന്നു. മദ്യപാനികളായ സ്ത്രീകളിൽ 2 ശതമാനമാണ് പങ്കെടുത്തത്.നേരത്തെ ലോകാരോഗ്യ സംഘടനയും മദ്യപാനികൾക്ക് 28 രോഗങ്ങളുണ്ടാകാമെന്ന് അറിയിച്ചിരുന്നു. ലിവർ സിറോസിസ് ആണ് ഇതിൽ പ്രധാനം. പക്ഷാഘാതം, ദഹനവ്യവസ്ഥ അർബുദം തുടങ്ങിയവയാണിവ. എന്നാൽ പുതിയ പഠനപ്രകാരം ആമവാതം, തിമിരം, കുടൽപുണ്ണ് എന്നിവയുൾപ്പെടെ മദ്യപാനത്തിന്റെ ഭാഗമായി വരാം. 11 ലക്ഷം പേരാണ് തുടർച്ചയായി മദ്യപാനം മൂലം ആശുപത്രിയിലാകുന്നത്.

Content Highlights: study says alchohol drinking cause 60 health problems