മരങ്ങള്‍ പിഴുതെറിഞ്ഞു, വൈദ്യുതി തൂണുകളും കടപുഴകി, ഗുജറാത്ത് തീരമേഖലയില്‍ സംഹാരതാണ്ഡവമാടി ബിപോര്‍ജോയ്; രണ്ടു മരണം, 22 പേര്‍ക്ക് പരുക്ക്

അഹ്മദാബാദ്: ഗുജറാത്ത് തീര മേഖലയിൽ സംഹാര താണ്ഡവമാടി ബിപോർജോയ് ചുഴലിക്കാറ്റ്. വ്യാഴാഴ്ച രാത്രിയോടെ കരതൊട്ട ചുഴലിക്കാറ്റിൽ ദ്വാരക, കച്ച്, സൗരാഷ്ട്ര മേഖലകളിൽ വ്യാപക നാശനഷ്ടമുണ്ടായി. രണ്ടു പേർ മരണപ്പെട്ടതായും റിപ്പോർട്ടുണ്ട്. ആടിനെ മേയ്ക്കാനായി പോയ ആളും അയാളുടെ മകനുമാണ് മരിച്ചത്. ഇവരുടെ 20ഓളം ആളുകളും ചത്തതായി റിപ്പോർട്ടുകൾ പറയുന്നു. 22 പേർക്ക് പരിക്കേറ്റിട്ടുണ്ട്. മരങ്ങളും വൈദ്യുതി തൂണുകളും വ്യാപകമായി കടപുഴകി.

#WATCH | Gujarat: Trees uprooted and property damaged in Naliya amid strong winds of cyclone 'Biparjoy' pic.twitter.com/d0C1NbOkXQ

— ANI (@ANI) June 16, 2023

സംസ്ഥാനത്തെ 950 ഗ്രാമങ്ങളില്‍ വൈദ്യുതി ബന്ധം താറുമാറായി. മാലിയ തെഹ്‌സില്‍ താലൂക്കില്‍ മാത്രം 45 ഗ്രാമങ്ങളില്‍ വൈദ്യുതി വിതരണം തടസ്സപ്പെട്ടു. തീരദേശ മേഖലയില്‍ 300ഓളം വൈദ്യുതി തൂണുകളാണ് കാറ്റില്‍ തകര്‍ന്നത്. വൈദ്യുതി ബന്ധം പുനസ്ഥാപിക്കാനുള്ള ശ്രമങ്ങളിലാണ് ജീവനക്കാര്‍. മണിക്കൂറില്‍ 100 കിലോമീറ്റര്‍ വരെ വേഗത്തില്‍ വീശിയടിച്ച ചുഴലിക്കാറ്റിന്റെ വേഗത ഇപ്പോള്‍ കുറഞ്ഞിട്ടുണ്ട്. പോര്‍ബന്ദര്‍, ദ്വാരക, കച്ച്, മോര്‍ബി ജില്ലകളില്‍ ആണ് ഏറ്റവും കൂടുതല്‍ നാശനഷ്ടങ്ങള്‍ ഉണ്ടായത്.

ഒന്നേകാല്‍ ലക്ഷത്തോളം ആളുകളെ മാറ്റിപ്പാര്‍പ്പിച്ചതിനാല്‍ വലിയൊരു ദുരന്തമാണ് വഴിമാറിയത്. ശക്തമായ മഴയാണ് ഗുജറാത്തിന്റെ തീര പ്രദേശങ്ങളിലും സമീപ ഗ്രാമങ്ങളിലും ലഭിക്കുന്നത്. ഒമ്പത് ജില്ലകളിലെ നൂറോളം ഗ്രാമങ്ങളിലായി ചുഴലിക്കാറ്റ് നാശം വിതച്ചു. ദേശീയസംസ്ഥാന ദുരന്ത നിവാരണ സേനകള്‍ രക്ഷാപ്രവര്‍ത്തനത്തിന് സജ്ജമായിട്ടുണ്ട്. വെള്ളിയാഴ്ച ഉച്ചയോടെ കേവല ചുഴലിക്കാറ്റായി മാറുന്ന ബിപോര്‍ജോയ് അര്‍ധരാത്രിയോടെ ന്യൂനമര്‍ദമായി മാറുമെന്നും കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്.

Cyclone Biparjoy batters Gujarat coast