അബ്ദുസ്സലാം കൂടരഞ്ഞി

റിയാദ് • ഉംറ വിസയിൽ വരുന്നവർക്ക് സഊദിയിലെ ഏത് വിമാനത്താവളത്തിലും ഇറങ്ങാമെന്ന് ഹജ്ജ്-ഉംറ മന്ത്രാലയം. മടക്കയാത്രക്കും ഈ അനുവാദമുണ്ടെന്ന് ഔദ്യോഗിക ട്വിറ്റർ പേജിൽ വന്ന ചോദ്യത്തിന് മന്ത്രാലയം മറുപടി നൽകി.

ഉംറ വിസകളിൽ വരുന്നവർക്ക് ജിദ്ദ, മദീന വിമാനത്താവളങ്ങളിൽ മാത്രമായിരുന്നു ഇതുവരെ അനുമതി. സഊദിയുടെ വിവിധ ഭാഗങ്ങളിൽ താമസിക്കുന്ന പ്രവാസികൾക്കും പുതിയ തീരുമാനം സഹായകമാകും. സഊദിയിലുള്ളവരുടെ അടുത്തേക്ക് നേരിട്ട് ഉംറ വിസയിലെത്തുന്ന കുടുംബങ്ങളെ ഏത് വിമാനത്താവളത്തിലും സ്വീകരിക്കാമെന്നതും യാത്രയാക്കാമെന്നതും ഇവർക്ക് ആശ്വാസമാണ്. പുതിയ ഉംറ വിസ നിയമപ്രകാരം 90 ദിവസം വരെ സഊദിയിൽ എവിടെയും സഞ്ചരിക്കാനും അനുവാദമുണ്ട്.
അതിനിടെ, വിദേശ ഉംറ തീർഥാടകരെ അതിഥികളായി കൊണ്ടുവരാൻ അനുവദിച്ചിരുന്ന ഉംറ ഹോസ്റ്റ് പദ്ധതി റദ്ദക്കി.