സ്വന്തം ലേഖകൻ
തൊടുപുഴ • ഇടുക്കി ജലസംഭരണിയുടെ ഭാഗമായ ചെറുതോണി അണക്കെട്ടിന്റെ അഞ്ച് ഷട്ടറുകളിൽ മൂന്നെണ്ണം തുറന്നു. സെക്കന്റിൽ ഒരു ലക്ഷം ലിറ്റർ ജലമാണ് (100 ക്യുമെക്‌സ്) പെരിയാറിലേക്ക് ഒഴുക്കി വിടുന്നത്.
ഇന്നലെ രാവിലെ 10ന് ജലനിരപ്പ് 2384.22 അടിയിലെത്തി നിൽക്കെയാണ് മൂന്നാം നമ്പർ ഷട്ടർ 40 സെന്റി മീറ്റർ ഉയർത്തിയത്. 10.30ന് ഇത് 40 ൽ നിന്ന് 75 സെന്റി മീറ്ററാക്കി കൂടുതൽ വെള്ളമൊഴുക്കി. എന്നാൽ ജലനിരപ്പ് അരയടിയോളം വീണ്ടും ഉയർന്നു. വൃഷ്ടിപ്രദേശത്ത് ശക്തമായ മഴ കാരണം മുല്ലപ്പെരിയാറിൽ നിന്ന് പുറത്തേക്കൊഴുക്കുന്ന വെള്ളത്തിന്റെ അളവും കൂട്ടി. ഇതേത്തുടർന്ന് റൂൾകർവ് കമ്മിറ്റി യോഗം ചേർന്ന് വൈകിട്ടോടെ രണ്ട് ഷട്ടറുകൾ കൂടി ഉയർത്താൻ തീരുമാനിച്ചു. വൈകിട്ട് 4.45ന് രണ്ടാം നമ്പർ ഷട്ടറും അഞ്ചിന് നാലാം നമ്പർ ഷട്ടറും 40 സെന്റി മീറ്റർ വീതം ഉയർത്തി. ഇന്ന് രാവിലെ ജലനിരപ്പ് വിലയിരുത്തിയശേഷം കുറഞ്ഞില്ലെങ്കിൽ രണ്ട് ഷട്ടർ കൂടി ഉയർത്താനാണ് തീരുമാനം. അങ്ങനെ വന്നാൽ സെക്കന്റിൽ രണ്ട് ലക്ഷം ലിറ്റർ വരെ വെള്ളം പുറത്തേക്കൊഴുക്കും.
ഇന്നലെ വൈകിട്ട് ഏഴിന് 2384.72 അടിയാണ് അണക്കെട്ടിലെ ജലനിരപ്പ്. സംഭരണ ശേഷിയുടെ 78.93 ശതമാനമാണിത്. വെള്ളിയാഴ്ച രാത്രി 7ന് ഓറഞ്ച് അലർട്ടും ശനിയാഴ്ച രാവിലെ 7 ന് റെഡ് അലർട്ടും അണക്കെട്ടിൽ പ്രഖ്യാപിച്ചിരുന്നു. തുറന്ന് വിടുന്ന വെള്ളത്തിന്റെ അളവ് താരതമ്യേന കുറവായതിനാൽ ചെറുതോണി പുഴയിൽ കാര്യമായി ജലനിരപ്പ് ഉയർന്നില്ല. മൂലമറ്റം പവർഹൗസിൽ വൈദ്യുതി ഉത്പാദനം ദിവസങ്ങളായി പരമാവധിയാണ്. ആറ് ദിവസത്തിനിടെ അണക്കെട്ടിൽ 11 ശതമാനം വെള്ളമാണ് കൂടിയത്. നിർമാണത്തിന് ശേഷം 11 ാം തവണയാണ് ഇടുക്കി ഡാം തുറക്കുന്നത്.