കോഴിക്കോട് • ദുരൂഹ സാഹചര്യത്തില്‍ മരണമടഞ്ഞ പന്തിരിക്കര സ്വദേശി ഇര്‍ഷാദ് ഉള്‍പ്പെട്ട സ്വര്‍ണക്കടത്തിലെ ഇടനിലക്കാരന്‍ ദുബൈയില്‍ സ്വര്‍ണക്കടത്ത് സംഘത്തിന്റെ പിടിയിലെന്ന് വിവരം. കണ്ണൂര്‍ സ്വദേശി ജസീലാണ് തടങ്കലിലായത്. ഇര്‍ഷാദിനെ തട്ടിക്കൊണ്ടുപോയ 916 നാസര്‍ എന്ന സ്വാലിഹിന്റെ സംഘമാണ് സംഭവത്തിന് പിന്നിലെന്നാണ് സൂചന. ജസീലിന് ക്രൂര മര്‍ദനമേറ്റതിന്റെ ചിത്രങ്ങള്‍ പുറത്തുവന്നിട്ടുണ്ട്.

ഇര്‍ഷാദിനെ സ്വര്‍ണക്കടത്തിനായി സ്വാലിഹിന്റെ സംഘവുമായി പരിചയപ്പെടുത്തിയത് ഇടനിലക്കാരന്‍ ജസീലായിരുന്നു. എന്നാല്‍, നാട്ടിലെത്തിയ ഇര്‍ഷാദ് സ്വര്‍ണം മറ്റൊരു സംഘത്തിന് കൈമാറി. സ്വര്‍ണം നഷ്ടപ്പെട്ടതോടെ സ്വാലിഹിന്റെ സംഘം ജസീലിനെ തടങ്കലിലാക്കുകയായിരുന്നു. ഇതേത്തുടര്‍ന്നാണ് സ്വാലിഹ് നാട്ടിലെത്തിയതും ഇര്‍ഷാദിനെ തട്ടിക്കൊണ്ടുപോയതുമെന്നാണ് അന്വേഷണ സംഘത്തിന്റെ നിഗമനം.