ഉനൈസ: ഉനൈസ സെൻട്രൽ കമ്മറ്റി ഫ്രീഡം സ്ക്വയറും, ഡോ: സുബൈർ ഹുദവി ചേകന്നൂരിന് സ്വീകരണവും സംഘടിപ്പിച്ചു. സമത്വം -സ്വാതന്ത്രം -സാഹോദര്യം എന്ന പ്രമേയമുയർത്തി ഇസ്തിറാഹ രീഫിൽ വെച്ച് നടന്ന ഫ്രീഡം സ്ക്വയർ ദേശിയ ഗാനത്തോടെയാണ് ആരംഭിച്ചത്.

പോയ കാലതുടിപ്പുകളെ പുതു തലമുറക്കായി അടയാളപെടുത്തുന്ന ഫ്രീഡം സ്ക്വയറിൽ സമരത്തിന്റെ മായാത്ത സ്മരണകളാണ് നിറഞ്ഞുനിൽക്കുന്നതെന്ന് സംഗമം ഉദ്ഘാടനം ചെയ്ത സയ്യിദ് അബ്ദുറഹ്‌മാൻ ജമലുല്ലൈലി തങ്ങൾ പറഞ്ഞു. ഖുർത്തുബ ഫൌണ്ടേഷൻ ഡയറക്ടർ ഡോ: സുബൈർ ഹുദവി മുഖ്യപ്രഭാഷണം നടത്തി.

രാഷ്ട്രനേതാക്കൾ വിഭാവനം ചെയ്ത രാജ്യത്തിന്റെ സമ്പൂർണ്ണ സ്വാതന്ത്ര്യം സാർത്ഥകമാക്കുന്നതിനും ഭരണഘടനാ സംരക്ഷണം ഉറപ്പുവരുത്തുന്നതിനും രാജ്യത്തെ പൗരന്മാർ പ്രാധാന്യം കല്പിക്കേണ്ട സമയമാണിത്. സ്വാതന്ത്ര്യത്തെയും ഭരണഘടനയേയും കശാപ്പു ചെയ്യാനുള്ള ശ്രമം ഭരണകൂടത്തിന്റെ ഒത്താശയോടെ തന്നെ നടന്നുകൊണ്ടിരിക്കുമ്പോൾ നിശ്ശബ്ദമായിരിക്കാൻ നമുക്കാവില്ല. ന്യൂനപക്ഷങ്ങൾക്കും ദളിതർക്കുമെതിരെ രാജ്യത്ത് നടന്നുകൊണ്ടിരിക്കുന്ന അതിക്രമങ്ങൾക്കെതിരെ ശക്തമായ ശബ്ദം ഉയരണം. വൈവിധ്യമാണ് വിവിധ സംസ്കാരങ്ങളുടെ സംഗമ ഭൂമിയായ ഇന്ത്യയുടെ കരുത്ത്.

വൈവിധ്യങ്ങളെ ഉൾക്കൊണ്ട് മതേതരത്വം നിലനിർത്താനും രാജ്യത്തിന്റെ സമഗ്രമായ വളർച്ചയ്ക്ക് ശക്തിപകരാനുമുള്ള ശ്രമങ്ങളിൽ എല്ലാവരും കണ്ണികളാവണമെന്നും ആദ്ദേഹം പറഞ്ഞു. പ്രസിഡന്റ്‌ സി. ടി. മൊയ്‌ദു അധ്യക്ഷത വഹിച്ചു. ബാസിത്‌ വാഫി, മൂസ മോങ്ങം, ജംഷീർ മങ്കട, ഷമീർ ഫെറോക്, സയ്യിദ് സുഹൈൽ, മുഹമ്മദ്‌ കാസർഗോഡ്, നാസർ ദാരിമി, അഷ്‌റഫ്‌ മേപ്പാടി, മൂസ മഞ്ചേരി, ജാഫർ വയനാട്, ഉസ്മാൻ കാസർഗോഡ്, സാദിഖ് മുസ്ലിയാർ, ശംസുദ്ധീൻ, അൻഷാദ് അമ്മിനിക്കാട്, ഖാലിദ് നല്ലളം, സകീർ തിരൂർ എന്നിവർ പ്രസംഗിച്ചു. റാഫി, റഊഫ്, ആദിൽ എന്നിവർ ദേശിയ ഗാനം ആലപിച്ചു
സെക്രട്ടറി സി. എസ്, ഖാജാഹുസൈൻ സ്വാഗതവും, ചെയർമാൻ സകീർ മാറാട് നന്ദിയും പറഞ്ഞു