തിരുവനന്തപുരം: ജോലി തടസപ്പെടുത്തി ഓണം ആഘോഷിക്കരുതെന്ന് നിര്‍ദേശം നല്‍കിയതില്‍ പ്രതിഷേധിച്ച് ഓണസദ്യ മാലിന്യത്തിലേക്കെറിഞ്ഞ തിരുവനന്തപുരം നഗരസഭാ ജീവനക്കാര്‍ക്കെതിരേ നടപടി. സി.ഐ.ടി.യു പ്രവര്‍ത്തകരായ 11 പേര്‍ക്കെതിരേയാണ് നടപടിയെടുത്തത്.

ഏഴ് സ്ഥിരം ജീവനക്കാരെ സസ്‌പെന്‍ഡ് ചെയ്തുവെന്നും താല്‍ക്കാലിക ജീവനക്കാരായ നാലു പേരെ ജോലിയില്‍നിന്ന് പിരിച്ചുവിട്ടുവെന്നും മേയര്‍ ആര്യാ രാജേന്ദ്രന്‍ അറിയിച്ചു. കഴിഞ്ഞ ദിവസമാണ് നഗരസഭയുടെ ചാല സര്‍ക്കിളില്‍ ഓണാഘോഷവുമായി ബന്ധപ്പെട്ട് ജീവനക്കാര്‍ക്ക് തയാറാക്കിയ ഓണസദ്യ സി.ഐ.ടി.യു പ്രവര്‍ത്തകര്‍ മാലിന്യത്തിലേക്ക് വലിച്ചെറിഞ്ഞത്. ആഹാരത്തിനോട് കാണിക്കുന്ന അങ്ങേയറ്റം നിന്ദ്യമായ പ്രവൃത്തിയെ ശക്തമായി അപലപിക്കുകയും തള്ളിപ്പറയുകയും ചെയ്യുന്നുവെന്ന് മേയര്‍ ഫേസ്ബുക്ക് പോസ്റ്റില്‍ പറഞ്ഞു.