തിരുവനന്തപുരം• മുഖ്യമന്ത്രി പിണറായി വിജയന്റെ യൂറോപ്യൻ പര്യടനം തുടങ്ങി. മന്ത്രിമാരായ പി. രാജീവും വി. അബ്ദുറഹിമാനും മുഖ്യമന്ത്രിയ്‌ക്കൊപ്പമുണ്ട്. ചൊവ്വാഴ്ച പുലർച്ചെ 3.45ന് നെടുമ്പാശേരി വിമാനത്താവളത്തിൽനിന്ന് യാത്ര തിരിച്ച സംഘത്തെ നോർവെയിലെ ഇന്ത്യൻ സ്ഥാനപതി ഡോ. ബാലഭാസ്‌കർ സ്വീകരിച്ചു.

നോർവേ, ഇംഗ്ലണ്ട്, വെയ്ൽസ് എന്നിവിടങ്ങളാണ് സന്ദർശിക്കുന്നത്. ലണ്ടനിൽ മുഖ്യമന്ത്രിയുടെ അധ്യക്ഷതയിൽ ലോകകേരളസഭയുടെ പ്രാദേശിക യോഗം വിളിച്ചു ചേർക്കും. ഗ്രാഫീൻ പാർക്ക് സ്ഥാപിക്കുന്നതിന് യു.കെയിലെ വിവിധ സർവകലാശാലകളുമായി ധാരണാപത്രം ഒപ്പു വയ്ക്കും.
പതിമൂന്നാം തീയതി വരെയാണ് സന്ദർശനം. ഒക്ടോബർ ഒന്നിന് പോകാൻ നിശ്ചയിച്ചിരുന്ന യാത്ര കോടിയേരി ബാലകൃഷ്ണന്റെ നിര്യാണത്തെ തുടർന്ന് ചൊവ്വാഴ്ചയിലേക്ക് മാറ്റുകയായിരുന്നു.ഇന്നലെ നടന്ന ഉന്നതതല ചർച്ചയിൽ കേരളത്തിൽ മാരിടൈം ക്ലസ്റ്റർ രൂപപ്പെടുത്തുന്നതിനും ഫിഷറീസ്, അക്വാകൾച്ചർ രംഗത്ത് പുതിയ പദ്ധതികൾ നടപ്പിലാക്കാനും നോർവേ സഹായ വാഗ്ദാനം നൽകി. 1953ൽ കൊല്ലം നീണ്ടകരയിൽ ആരംഭിച്ച നോർവീജിയൻ പദ്ധതി കേരളത്തിലെ മത്സ്യബന്ധന മേഖലയിലുണ്ടാക്കിയ ഗുണപരമായ മാറ്റങ്ങളെ സംബന്ധിച്ച് മുഖ്യമന്ത്രി കൂടിക്കാഴ്ചയിൽ വിശദീകരിച്ചു. ഇന്ത്യ – നോർവേ സഹകരണത്തിൽ കേരളം ഒരു പ്രധാനഘടകമാണെന്ന് നോർവേ ഫിഷറീസ് ആൻഡ് ഓഷ്യൻ പോളിസി മന്ത്രി ജോർണർ സെൽനെസ്സ് സ്‌കെജറൻ പറഞ്ഞു. വ്യവസായ മന്ത്രി പി. രാജീവ് മാരിടൈം ക്ലസ്റ്ററിന്റെ പ്രാധാന്യവും ഈ മേഖലയിലെ സാങ്കേതിക സഹകരണത്തിന്റെ ആവശ്യകതയും വിശദീകരിച്ചു.

മറൈൻ അക്വാകൾച്ചർ മേഖലയിൽ കേരളവും നോർവേയും തമ്മിലുള്ള സഹകരണം കൂട്ടേണ്ടതിന്റെ പ്രാധാന്യത്തെക്കുറിച്ച് ഫിഷറീസ് വകുപ്പ് മന്ത്രി വി അബ്ദുറഹിമാൻ സംസാരിച്ചു.
ആസൂത്രണ ബോർഡ് വൈസ് ചെയർപേഴ്‌സൺ ഡോ. വി.കെ രാമചന്ദ്രൻ, ചീഫ് സെക്രട്ടറി ഡോ. വി പി ജോയ്, ഡൽഹിയിലെ സംസ്ഥാന സർക്കാരിന്റെ ഓഫിസർ ഓൺ സ്‌പെഷൽ ഡ്യൂട്ടി വേണു രാജാമണി, കെ.എസ് ശ്രീനിവാസ് എന്നിവരും ചർച്ചയിൽ പങ്കെടുത്തു.