ബംഗളൂരു: കേരളത്തിലെ വിവാദങ്ങള്‍ കെട്ടടങ്ങും മുമ്പേ കര്‍ണാടക ഭാരത് ജോഡോ യാത്രയുടെ ഫഌക്‌സിലും സവര്‍ക്കറുടെ ചിത്രം. കഴിഞ്ഞ ദിവസം ഭാരത് ജോഡോ യാത്രയ്ക്ക് അഭിവാദ്യം അര്‍പ്പിച്ച സവര്‍ക്കറുടെ ഫോട്ടോയുള്ള ഫ്‌ളക്‌സ് സോഷ്യല്‍ മീഡിയയില്‍ വൈറലായിരുന്നു.

കോണ്‍ഗ്രസ് എംഎല്‍എ എന്‍ എ ഹാരീസിന്റെ പേരിലുള്ള ഫ്‌ളക്‌സില്‍ രാഹുല്‍ നടക്കുന്നതിന്റെ ചിത്രത്തിനൊപ്പം കര്‍ണാടക മുന്‍ മുഖ്യമന്ത്രി സിദ്ധരാമയ്യയും കോണ്‍ഗ്രസ് കര്‍ണാടക അധ്യക്ഷന്‍ ഡി കെ ശിവകുമാറുമാണുള്ളത്. ഇതിന്റെ ബാക്ക്ഗ്രൗണ്ടിലായി സവര്‍ക്കറുടെ വലിയ ചിത്രവും ഫ്ളക്‌സിലുണ്ട്.

കഴിഞ്ഞ ദിവസം മുതല്‍ കോണ്‍ഗ്രസിന്റെ രാഷ്ട്രീയ എതിരാളികള്‍ ഫ്‌ളക്‌സിന്റെ ചിത്രം സോഷ്യല്‍ മീഡിയയില്‍ വ്യാപകമായി പ്രചരിപ്പിച്ചിരുന്നു.

എന്നാല്‍, അത്തരമൊരു ചിത്രം പാര്‍ട്ടി വച്ചിട്ടില്ലെന്ന് കര്‍ണാടക കോണ്‍ഗ്രസ് വൃത്തങ്ങള്‍ പറഞ്ഞു. ഭാരത് ജോഡോ യാത്രയുടെ വിജയം കുറയ്ക്കാന്‍ ചില വര്‍ഗീയ കക്ഷികള്‍ സ്ഥാപിച്ച വ്യാജ ഫ്‌ളക്‌സാണിതെന്ന് കോണ്‍ഗ്രസ് വൃത്തങ്ങള്‍ പറയുന്നു. ഇത്തരം പ്രചാരണങ്ങള്‍ക്കെതിരെ നിയമനടപടി അടക്കം ആലോചിക്കുന്നുണ്ടെന്നും കോണ്‍ഗ്രസ് വൃത്തങ്ങള്‍ പറഞ്ഞു.