പട്ടാമ്പി: കേരള സര്‍ക്കാര്‍ ലോട്ടറി നമ്പര്‍ ഉപയോഗിച്ച് കംപ്യൂട്ടര്‍ ആപ്ലിക്കേഷന്‍ ഉണ്ടാക്കി ഓണ്‍ലൈന്‍ വഴി സമാന്തര ലോട്ടറി ചൂതാട്ടം നടത്തിയിരുന്ന രണ്ട് പേരെ പട്ടാമ്പി പൊലിസ് പിടികൂടി. തിരുവേഗപ്പുറ ചാത്തപുള്ളിയില്‍ സുനില്‍ (36), പള്ളിപ്പുറം ആശാരിപ്പുരക്കല്‍ ശിവദാസ് (45) എന്നിവരാണ് അറസ്റ്റിലായത്.
തിരുവേഗപ്പുറയിലെ സുനിലിന്റെ കടയില്‍ നിന്നാണ് പൊലിസ് പ്രതികളെ പിടികൂടിയത്.കേരളലോട്ടറിയുടെ അവസാന മൂന്നക്കം പത്ത് രൂപ നിരക്കില്‍ തെരഞ്ഞെടുപ്പിച്ച് ആ മൂന്ന് അക്കത്തിന് നറുക്ക് എടുപ്പിലൂടെ ഒന്നാം സമ്മാനം ലഭിച്ചാല്‍ 5000 രൂപ കിട്ടുന്ന രീതിയില്‍ ആണ് സമാന്തരമായി ലോട്ടറി ചൂതാട്ടം പ്രതികള്‍ നടത്തിയെതെന്ന് പൊലിസ് പറഞ്ഞു. ഇതിനായി കംപ്യൂട്ടര്‍ ആപ്ലിക്കേഷനും ഉപയോഗിച്ചിരുന്നതായും പൊലിസ് വ്യക്തമാക്കി.
പ്രതികളെ കൂടാതെ കൂടുതല്‍ പേര്‍ ഈ സംഘത്തില്‍ ഉള്ളതായി വിവരം ലഭിച്ചിട്ടുണ്ടെന്ന് പൊലിസ് പത്രകുറിപ്പില്‍ അറിയിച്ചു. പട്ടാമ്പി സി.ഐ പി.എസ് സുരേഷിന്റെ നേതൃത്വത്തില്‍ എസ്.ഐ ലൈസാദ് മുഹമ്മദ്, എ.എസ്.ഐ ബഷീര്‍, ക്രൈം സ്‌ക്വാഡ് അംഗങ്ങളായ സി.പി.ഒ വിനോദ്, അബ്ദുല്‍ റഷീദ്, ബുജു, ഷാജഹാന്‍, രാമകൃഷ്ണന്‍ തുടങ്ങിയവരാണ് പ്രതികളെ പിടികൂടിയ പൊലിസ് സംഘത്തില്‍ ഉണ്ടായിരുന്നത്.