നെടുമ്പാശ്ശേരി: ഹജ്ജ് കര്‍മം നടത്താന്‍ അപേക്ഷിച്ചപ്പോള്‍ നല്ല ആരോഗ്യമുണ്ടായിരുന്നു. എന്നാല്‍, ഇപ്പോള്‍ ഒന്നിനും കൊള്ളാതായിരിക്കുന്നു. പ്രമേഹം, കൊളസ്‌ട്രോള്‍, പ്രഷര്‍ എല്ലാരോഗവും കൂട്ടിനുണ്ട്. ഇടയ്ക്ക് റോഡപകടത്തില്‍പെട്ട് കാല്‍മുട്ടിനും ഒടിവുപറ്റി. ആലുവ ഏലൂക്കര സ്വദേശി നൂര്‍ജഹാന്‍ തന്റെ വിശേഷങ്ങള്‍ 'സുപ്രഭാത'ത്തോട് പങ്കുവച്ചു.
കാലതാമസം കൂടാതെതന്നെ പുണ്യഭൂമിയിലേക്കു പുറപ്പെടാന്‍ അനുമതി ലഭിക്കണമെന്നായിരുന്നു അപേക്ഷയില്‍ ആവശ്യപ്പെട്ടത്. രോഗികള്‍ക്കും മറ്റും പ്രത്യേക പരിഗണന ലഭ്യമാക്കാന്‍ ഹജ്ജ് കമ്മിറ്റി സജ്ജീകരിച്ചിരിക്കുന്ന വനിതകളുടെ ക്ലിനിക്കല്‍ റൂമിലായിരുന്നു നൂര്‍ജഹാനും മറ്റ് എട്ടോളം 60 കഴിഞ്ഞ വനിതകളും. 74കാരിയായ ഇരിക്കൂര്‍ ചൂളിയാട് ഫാത്തിമയ്ക്ക് ഓര്‍മ അല്‍പ്പം കുറവാണെങ്കിലും താന്‍ വര്‍ഷങ്ങളോളം നെഞ്ചേറ്റിയ സ്വപ്നമാണ് സാക്ഷാല്‍ക്കരിക്കാന്‍ പോകുന്നതെന്ന് നന്നായി അറിയാം.
74കാരിയായ കാസര്‍കോട് സ്വദേശിനി അച്ചുമ്മിയാകട്ടെ ജിദ്ദയിലെ ഹജ്ജ് വിശേഷങ്ങള്‍ സുപ്രഭാതത്തിലൂടെ വായിച്ചറിയുകയായിരുന്നു യാത്ര പുറപ്പെടുന്നതിനുമുന്‍പ്.