ന്യൂഡല്‍ഹി: അഫ്ഗാനിസ്ഥാനില്‍ നിന്ന് ഇന്ത്യക്കാരെയും ഇന്ത്യയിലേക്ക് വരാന്‍ താല്‍പര്യമുള്ള അഫ്ഗാനികളെയും ഒഴിപ്പിക്കുന്ന നടപടിക്ക് ഓപ്പറേഷന്‍ ദേവീ ശക്തി എന്ന് പേരിട്ട് കേന്ദ്ര സര്‍ക്കാര്‍. അഫ്ഗാനിസ്ഥാനില്‍ നിന്ന് 24 ഇന്ത്യക്കാരടക്കം 78 പേരെ താജിക്കിസ്ഥാന്‍ വഴി ഇന്ത്യയിലെത്തിച്ചത് സംബന്ധിച്ച് ട്വീറ്റ് ചെയ്ത വിദേശകാര്യമന്ത്രി എസ്. ജയ്ശങ്കറാണ് ഓപ്പറേഷന്‍ ദേവീ ശക്തിയെന്ന പേര് പരാമര്‍ശിച്ചത്. മലയാളി കന്യാസ്ത്രീ തെരേസ ക്രാസ്തയടക്കം 78 പേരെയാണ് ഇന്ന് ഇന്ത്യയിലെത്തിച്ചത്. 

 

ഇവരെ കേന്ദ്രമന്ത്രിമാരായ ഹര്‍ദീപ് സിങ് പുരി, വി. മുരളീധരന്‍ എന്നിവര്‍ ചേര്‍ന്ന് സ്വീകരിച്ചു. അഫ്ഗാനില്‍ നിന്നെത്തിച്ച സിഖ് ഗ്രന്ഥമായ ഗുരുഗ്രന്ഥസാഹിബിന്റെ മൂന്ന് പകര്‍പ്പുകളും മന്ത്രിമാര്‍ ഏറ്റുവാങ്ങി. തിങ്കളാഴ്ച കാബൂളില്‍ നിന്ന് അമേരിക്കന്‍ വിമാനത്തില്‍ തെരേസയടക്കമുള്ള 8 സിസ്‌റ്റേഴ്‌സ് ഓഫ് ചാരിറ്റി അംഗങ്ങളെ താജിക്കിസ്ഥാനില്‍ എത്തിക്കുകയും അവിടെ നിന്ന് ഇന്ത്യയിലെത്തിക്കുകയുമായിരുന്നു. ഇതുവരെ 800ലധികം പേരെ അഫ്ഗാനിസ്ഥാനില്‍ നിന്ന് ഇന്ത്യയിലെത്തിച്ചതായി വിദേശകാര്യമന്ത്രാലയം അധികൃതര്‍ അറിയിച്ചു.