കോഴിക്കോട്: അയല്‍വാസിയുടെ വെട്ടേറ്റ് മദ്രസ അധ്യാപകന് ഗുരുതര പരിക്ക്. കുന്ദമംഗലം പതിമംഗലത്തുള്ള അഷ്‌റഫ് സഖാഫിക്കാണ് വെട്ടേറ്റത്. കൈക്കും കാലിനും സാരമായി പരിക്കേറ്റിട്ടുണ്ട്. കുന്ദമംഗലം പൊലിസ് കേസെടുത്തുവെങ്കിലും പ്രതിയെ പിടികൂടിയിട്ടില്ല.

കഴിഞ്ഞ വ്യാഴാഴ്ച ഉച്ചയ്ക്കാണ് സംഭവം.. അഷ്‌റഫ് സഖാഫിയെ അയല്‍വാസിയായ ഷമീര്‍ വഴിയില്‍ വെച്ച് വെട്ടുകയായിരുന്നു.

കൊടുവാളുമായെത്തിയ ഷമീര്‍ കുട്ടികള്‍ ഉള്‍പ്പെടെയുള്ളവരെ അക്രമിക്കാന്‍ ശ്രമിച്ചെന്നും വീടിന്റെ ജനല്‍ തകര്‍ത്തെന്നും അഷ്‌റഫ് സഖാഫി പറയുന്നു. ഭീതി കാരണം കുടുംബത്തിന് വീട്ടില്‍ നില്‍ക്കാന്‍ കഴിയാത്ത സ്ഥിതിയാണെന്ന് അഷ്‌റഫ് സഖാഫി പറയുന്നു.

വ്യക്തിവൈരാഗ്യമാണ് ആക്രമണത്തിന് കാരണമെന്നാണ് വിവരം. ഷമീര്‍ നേരത്തെയും അഷ്‌റഫ് സഖാഫിക്ക് നേരെ കയ്യേറ്റ ശ്രമം നടത്തിയിരുന്നുവെന്ന് നാട്ടുകാര്‍ പറഞ്ഞു.പ്രതിയെ പിടികൂടാത്തതില്‍ കടുത്ത പ്രതിഷേധത്തിലാണ് പ്രദേശവാസികള്‍.