ദോഹ: ഫിഫ ലോകകപ്പില്‍ ഏറ്റവും കൂടുതല്‍ മത്സരങ്ങള്‍ കളിച്ച താരമെന്ന റെക്കോഡിന് ഇനി രണ്ട് അവകാശികള്‍. ഇന്നലെ ലുസൈല്‍ സ്റ്റേഡിയത്തില്‍ ലൂക്കാ മോഡ്രിച്ചിന്റെ ക്രൊയേഷ്യക്കെതിരായ ഖത്തര്‍ ലോകകപ്പിന്റെ ആദ്യ സെമി ഫൈനലില്‍ അര്‍ജന്റീനയ്ക്കായി കളിച്ചതോടെ ലയണല്‍ മെസ്സി 25 മല്‍സരങ്ങള്‍ കളിച്ച ജര്‍മനിയുടെ ഇതിഹാസ താരം ലോതര്‍ മത്തേയൂസിന്റെ റെക്കോഡിനൊപ്പമെത്തി. ഫൈനലിലെത്തിയതിനാല്‍ മത്തേയൂസിന്റെ റെക്കോഡ് മറികടന്ന് ഒരോയൊരു അവകാശിയാവാന്‍ മെസ്സിക്ക് കഴിയും. ജര്‍മനിയുടെ മിറോസ്ലാവ് ക്ലോസെ ലോകകപ്പില്‍ 24 മത്സരങ്ങള്‍ കളിച്ചിട്ടുണ്ട്.

ക്രൊയേഷ്യക്കെതിരേ ഇന്നലെ നടന്ന സെമി ഫൈനലില്‍ മെസ്സി ഒന്നിലധികം റെക്കോഡുകളാണ് നേടിയത്.
ലോകകപ്പില്‍ അര്‍ജന്റീനയ്ക്കായി ഏറ്റവുമധികം ഗോള്‍ നേടിയ താരമെന്ന റെക്കോഡും മെസ്സി സ്വന്തം പേരില്‍ എഴുതിച്ചേര്‍ത്തു. 10 ഗോള്‍ നേടിയ ഗബ്രിയേല്‍ ബാറ്റിസ്റ്റ്യൂട്ടയെ മെസ്സി പിന്തള്ളി. ഇന്നലെ പെനാല്‍ട്ടി ലക്ഷ്യത്തിലെത്തിച്ചാണ് മെസ്സി ചരിത്രമെഴുതിയത്.

ഗോള്‍ അസിസ്റ്റില്‍ ഫുട്‌ബോള്‍ ഇതിഹാസം ഡീഗോ മറഡോണയുടെ റെക്കോഡിനൊപ്പമെത്താനും ഇന്നലെ മെസ്സിക്ക് കഴിഞ്ഞു. അല്‍വാരസിന് ഗോളടിക്കാന്‍ പാകത്തില്‍ പന്ത് നല്‍കിയതോടെ മെസ്സിയുടെ പേരില്‍ എട്ട് ഗോള്‍ അസിസ്റ്റായി. ലോകകപ്പ് നോക്കൗട്ടില്‍ ഏറ്റവുമധികം അസിസ്റ്റ് നല്‍കിയ (അഞ്ച്) താരമെന്ന റെക്കോഡ് ബ്രസീലിന്റെ ഇതിഹാസ താരം പെലെയെ (നാല്) മറികടന്ന് മെസ്സി നേരത്തേ സ്വന്തംപേരില്‍ എഴുതിച്ചേര്‍ത്തിരുന്നു.

അഞ്ച് ലോകകപ്പുകളില്‍ പങ്കെടുത്ത ആറു പേരില്‍ ഒരാളും ഏക അര്‍ജന്റീന താരവുമാണ് മെസ്സി. അന്റോണിയോ കാര്‍ബജല്‍, മത്തേയൂസ്, റാഫ മാര്‍ക്വേസ്, ആന്ദ്രെസ് ഗാര്‍ഡാഡോ, ക്രിസ്റ്റ്യാനോ റൊണാള്‍ഡോ എന്നിവര്‍ മാത്രമാണ് അഞ്ച് ലോകകപ്പുകളില്‍ കളിച്ചിട്ടുള്ളത്. ലോകകപ്പില്‍ ക്യാപ്റ്റന്‍ എന്ന നിലയില്‍ ഏറ്റവും കൂടുതല്‍ മത്സരങ്ങള്‍ കളിച്ചതും മെസ്സിയാണ്.