ആലപ്പുഴ : പൊഴിയില്‍ കുളിക്കാനിറങ്ങിയ സഹോദരങ്ങളായ രണ്ട് വിദ്യാര്‍ഥികള്‍ മുങ്ങി മരിച്ചു. ആലപ്പുഴ ഓമനപ്പുഴ പൊഴിയില്‍ വൈകിട്ട് അഞ്ചു മണിയോടെയായിരുന്നു സംഭവം. മാരാരിക്കുളം തെക്ക് പഞ്ചായത്ത് 15-ാം വാര്‍ഡില്‍ നാലു തൈക്കല്‍ നെപ്പോളിയന്‍-ഷൈമോള്‍ ദമ്പതികളുടെ മക്കളായ അഭിജിത് (10) അനഘ (9) എന്നിവരാണ് മരിച്ചത്.
അഭിജിത്തും അനഘയും പൊഴിയോരത്ത് കളിക്കുമ്പോഴായിരുന്നു അപകടം. നീരൊഴുക്കില്‍പ്പെട്ട് പൊഴിത്തിട്ടയ്ക്ക് ഇളക്കംതട്ടിയ ഇടത്ത് കുട്ടികള്‍ ചവിട്ടിയപ്പോള്‍ പൊഴിയില്‍ വീണതാണെന്നാണ് സൂചന.
അഭിജിത് അഞ്ചാം ക്ലാസിലും അനഘ നാലാം ക്ലാസിലുമാണ് പഠിക്കുന്നത്. കുട്ടികളുടെ അമ്മ ഷൈമോള്‍ വിദേശത്താണ്. മൃതദേഹം ആലപ്പുഴ വണ്ടാനം മെഡിക്കല്‍ കോളജ് മോര്‍ച്ചറിയിലേക്ക് മാറ്റി.