തൊടുപുഴ: തൊടുപുഴ നഗരത്തിലെ ഫുട്പാത്ത് കച്ചവടവും പൊതുനിരത്ത് കൈയേറി സ്ഥാപിച്ചിട്ടുള്ള ഫ്‌ളക്‌സ് ബോര്‍ഡുകളും സെപ്തംബര്‍ ഒന്നിനകം ഒഴിപ്പിക്കുമെന്ന് ചെയര്‍പേഴ്‌സണ്‍ സഫിയ ജബ്ബാര്‍ അറിയിച്ചു.
അനധികൃത കൈയേറ്റം ഒഴിപ്പിക്കുന്നതില്‍ നഗരസഭ നിസംഗത പുലര്‍ത്തുന്നുവെന്ന ആക്ഷേപം ശക്തമായതോടെയാണ് ഒടുവില്‍ നടപടിക്ക് തീരുമാനിച്ചത്. കാല്‍നട പോലും അസാധ്യമാകുന്ന വിധത്തില്‍ ഫുട്പാത്തുകളില്‍ കച്ചവടം പെരുകുകയാണ്.
നഗരത്തിലെ പല കച്ചവടസസ്ഥാപനങ്ങളും നിരത്തിലേക്ക് സാധനങ്ങള്‍ ഇറക്കിവെച്ച് കച്ചവടം ചെയ്യുന്നുണ്ട്. ചില മൊബൈല്‍ ഷോപ്പുകള്‍ക്ക് മുന്നില്‍ നടപ്പാതയില്‍ ബൊമ്മകള്‍ സ്ഥാപിച്ചിരിക്കുന്നതും ജനങ്ങള്‍ക്ക് ബുദ്ധിമുട്ടായി.
വൈദ്യുതി പോസ്റ്റുകളില്‍ സ്ഥാപിച്ചിട്ടുള്ള ഫ്‌ളക്‌സ് ബോര്‍ഡുകള്‍ പലപ്പോഴും അപകടം ക്ഷണിച്ചു വരുത്തുന്നുണ്ട്. ഫ്‌ളക്‌സ് ബോര്‍ഡുകളില്‍ തലയിടിച്ച് പരിക്കേറ്റ സംഭവവുമുണ്ടായി. പൊതുമരാമത്ത് വകുപ്പിന്റെ റോഡ് ദിശാബോര്‍ഡുകള്‍ പോലും മറച്ചാണ് ചിലയിടങ്ങളില്‍ ഫ്‌ളക്‌സ് ബോര്‍ഡുകള്‍ ഉയര്‍ത്തിയിട്ടുള്ളത്.
ഓണം അടുത്തതോടെ പൊതുനിരത്ത് കൈയേറിയുള്ള കച്ചവടം വര്‍ധിക്കുന്നതോടൊപ്പം ഫ്‌ളക്‌സ് ബോര്‍ഡുകളുടെ അതിപ്രസരവും ഉണ്ടാകാനുള്ള സാധ്യത കൂടി കണക്കിലെടുത്താണ് നഗരസഭ നടപടിക്ക് തുനിഞ്ഞിറങ്ങുന്നത്.
സെപതംബര്‍ ഒന്നിനകം ഫ്ട്പാത്ത് കച്ചവടം അവസാനിപ്പിച്ചില്ലെങ്കില്‍ മുന്നറിയിപ്പില്ലാതെ നഗരസഭ അവ നീക്കം ചെയ്യും.
ഫ്‌ളക്‌സ് ബോര്‍ഡുകളുടെ കാര്യത്തിലും ഇതേ നടപടി തന്നെ സ്വീകരിക്കും. ഉത്തരവാദികള്‍ക്കെതിരെ കര്‍ശനനടപടിയും സ്വീകരിക്കുമെന്ന് നഗരസഭാ ചെയര്‍പേഴ്‌സണ്‍ വ്യക്തമാക്കി.
അതേസമയം വഴിയോര കച്ചവടക്കാരെ തൊഴില്‍സുരക്ഷ നല്‍കി സംരക്ഷിക്കാനും അവര്‍ക്ക് സര്‍ക്കാര്‍ ഏര്‍പ്പെടുത്തിയിട്ടുള്ള ആനുകൂല്യങ്ങള്‍ ലഭ്യമാക്കാനും നടപടി സ്വീകരിച്ചില്ലെങ്കില്‍ തൊടുപുഴ നഗരസഭക്കെതിരെ ബഹുജനങ്ങളെ അണിനിരത്തി ശക്തമായ പ്രക്ഷോഭം സംഘടിപ്പിക്കാന്‍ വഴിയോര കച്ചവട തൊഴിലാളി ഫെഡറേഷന്‍(സിഐടിയു) ഏരിയാ കമ്മിറ്റി തീരുമാനിച്ചു. നഗരസഭാ പരിധിയിലെ വഴിയോര കച്ചവടക്കാര്‍ തങ്ങളുടെ തൊഴില്‍ ഉപേക്ഷിച്ച് കച്ചവടം അവസാനിപ്പിക്കണമെന്ന നഗരസഭയുടെ നിര്‍ദേശം തൊഴിലാളിവിരുദ്ധ നിലപാടാണ്.
തീര്‍ത്തും സാധാരണക്കാരാണ് വഴിയോര കച്ചവടക്കാര്‍. ജനങ്ങള്‍ക്ക് ഏറ്റവും ലാഭകരമായും സൗകര്യപ്രദമായും ഉല്‍പന്നങ്ങള്‍ നല്‍കാനാണ് വഴിയോര കച്ചവടക്കാര്‍ ശ്രമിക്കുന്നത്.
എന്നാല്‍, ഈ രംഗത്തെ വന്‍കിട ലോബികള്‍ വഴിയോര കച്ചവടക്കാര്‍ക്കെതിരെ ഗൂഡനീക്കം നടത്തുകയാണ്. വഴിയോര കച്ചവടക്കാരെ ഒഴിപ്പിക്കാനുള്ള നഗരസഭയുടെ തീരുമാനം ഇതിന്റെ ഭാഗമാണ്.
നഗരത്തിലെ വന്‍കിട കൈയേറ്റക്കാരെ സംരക്ഷിക്കുകയും മറുവശത്ത് സാധാരണക്കാരായ വഴിയോര കച്ചവടക്കാരെ ദ്രോഹിക്കുകയും ചെയ്യുന്ന നിലപാടാണ് നഗരസഭയുടേത്.
ഈ മനോഭാവത്തില്‍ നിന്ന് നഗരസഭാ ഭരണാധികാരികള്‍ പിന്തിരിയണമെന്നും ഫെഡറേഷന്‍ ആവശ്യപ്പെട്ടു.
യോഗത്തില്‍ ജില്ലാ കണ്‍വീനര്‍ എ എസ് ജാഫര്‍ഖാന്‍, തൊടുപുഴ ഏരിയാ സെക്രട്ടറി എ എല്‍ ഷാജി, ഏരിയാ കമ്മിറ്റിയംഗങ്ങളായ പുഷ്പലത, സത്യന്‍, അന്‍സില്‍, ജെയ്‌സണ്‍ എന്നിവര്‍ സംസാരിച്ചു.

`