പോങ്ങ്യാങ്: ശബ്ദത്തേക്കാള്‍ അഞ്ചിരട്ടി വേഗം സഞ്ചരിക്കുന്ന ഹൈപര്‍ സോണിക് മിസൈല്‍ പരീക്ഷിച്ച് ഉത്തര കൊറിയ. കഴിഞ്ഞദിവസമാണ് ഉത്തര കൊറിയ പുതിയ ആയുധം പരീക്ഷിച്ചത്.  അഞ്ചുവര്‍ഷ സൈനികവികസന പദ്ധതിയിലെ അഞ്ച് പ്രധാന ആയുധങ്ങളിലൊന്നാണിതെന്ന് ദേശീയ വാര്‍ത്താ ഏജന്‍സി റിപ്പോര്‍ട്ട് ചെയ്തു.

ആണവ പോര്‍മുനകള്‍ വഹിക്കാന്‍ ശേഷിയുണ്ടെന്നു കരുതുന്ന മിസൈല്‍ പരീക്ഷിച്ചത് യു.എന്നിന്റെ കടുത്ത ഉപരോധം നേരിടുന്നതിനിടെയാണ്. ഇതോടെ യു.എസ്, റഷ്യ, ചൈന, ഇന്ത്യ എന്നീ രാജ്യങ്ങള്‍ക്കു മാത്രം സ്വന്തമായിരുന്ന മിസൈല്‍ ശേഷി ഉത്തര കൊറിയയും നേടി. ഹൈപര്‍ സോണിക് മിസൈലുകളെ വിമാനവേധ മിസൈലുകള്‍ കൊണ്ട് തകര്‍ക്കുക എളുപ്പമല്ലെന്ന് വിദഗ്ധര്‍ പറയുന്നു.