തൊടുപുഴ: മുല്ലപ്പെരിയാര്‍ അണക്കെട്ടിലെ ജലനിരപ്പ് 137.6 അടിയായി ഉയര്‍ന്നു. 138 അടി എത്തിയാല്‍ രണ്ടാംഘട്ട മുന്നറിയിപ്പ് നല്‍കും. 142 അടിയാണ് അനുവദനീയമായ പരമാവധി ജലനിരപ്പ്. ഇന്നലെ ജലനിരപ്പ് ഉയരുന്നതില്‍ പകല്‍ കാര്യമായ കുറവ് വന്നെങ്കിലും വൈകിട്ട് വീണ്ടും മഴ ആരംഭിച്ചു. സെക്കന്റില്‍ 9200 ഘനയടി വെള്ളമാണ് അണക്കെട്ടിലേക്ക് ഒഴുകിയെത്തുന്നത്. സെക്കന്‍ഡില്‍ 2200 ഘനയടി വീതമാണ് തമിഴ്‌നാട് വൈഗ അണക്കെട്ടിലേക്ക് കൊണ്ടുപോകുന്നത്. വൈഗയിലെ ജലനിരപ്പ് 58.66 അടിയായി ഉയര്‍ന്നു. 71 അടിയാണ് പരമാവധി സംഭരണശേഷി. രണ്ടുദിവസമായി പദ്ധതി പ്രദേശത്ത് മഴ ശക്തമായി തുടരുകയാണ്.
സുപ്രിംകോടതി നിയോഗിച്ച ഉന്നതാധികാര സമിതി വര്‍ഷത്തില്‍ ഒരിക്കല്‍ പോലും ഡാമില്‍ എത്താറില്ല. ഇടയ്ക്കുള്ള ഉപസമിതിയുടെ സന്ദര്‍ശനം വഴിപാടായി മാറുകയും ചെയ്യുന്നു. തമിഴ്‌നാടിന്റെയും കേരളത്തിന്റെയും ഉദ്യോഗസ്ഥര്‍ സമിതിയിലുണ്ടെങ്കിലും ഡാമിന്റെ നിയന്ത്രണം തമിഴ്‌നാടിനായതിനാല്‍ സന്ദര്‍ശനം നിയന്ത്രിക്കുന്നത് അവരാണ്. മാധ്യമ പ്രവര്‍ത്തകര്‍ക്ക് അണക്കെട്ടില്‍ വിലക്കാണ്. 2014 മെയ് ഏഴിന് മുല്ലപ്പെരിയാര്‍ ജലനിരപ്പ് 136ല്‍നിന്ന് 142 അടിയാക്കാമെന്ന് സുപ്രിം കോടതി വിധിച്ചത് തമിഴ്‌നാടിന്റെ ബലംകൂട്ടി. ഇതിനുശേഷംആറാം തവണയാണ് അണക്കെട്ടിലെ ജലനിരപ്പ് 136 അടി കടക്കുന്നത്.