നീറ്റ് പരീക്ഷാ ക്രമക്കേടിനെ തുടര്‍ന്ന് രാജ്യത്താകെ 63 വിദ്യാര്‍ത്ഥികളെ ഡീബാര്‍ ചെയ്ത് ദേശീയ അന്വേഷണ ഏജന്‍സി. ഇതില്‍ 30 പേര്‍ ഗോദ്രയിലെ പരീക്ഷാ കേന്ദ്രത്തില്‍ നിന്നുള്ളവരാണെന്ന് എന്‍ടിഎ അറിയിച്ചു.  ഇതിന് പുറമെ ബീഹാറില്‍ നിന്നുള്ള 17 വിദ്യാര്‍ത്ഥികള്‍ക്കെതിരെയും അധികൃതര്‍ നടപടി സ്വീകരിച്ചിട്ടുണ്ട്.അതിനിടെ പരീക്ഷാ ക്രമക്കേടിനെ തുടര്‍ന്ന് ഇന്ന് നടന്ന നീറ്റ് പുന:പരീക്ഷയെഴുതാതെ 750 വിദ്യാര്‍ഥികള്‍. 1,563 വിദ്യാര്‍ത്ഥികളില്‍ 813 പേര്‍ മാത്രമാണ് പരീക്ഷയെഴുതാനെത്തിയത്. 52 ശതമാനമാണ് ഹാജര്‍ നിലയെന്ന് വൈകുന്നേരം എന്‍.ടി.എ പുറത്തുവിട്ട കണക്കുകളില്‍ പറയുന്നു.

സുപ്രിം കോടതി ഉത്തരവിനെത്തുടര്‍ന്നാണ് നീറ്റ് പരീക്ഷയില്‍ ഗ്രേസ് മാര്‍ക്ക് ലഭിച്ച 1,563 വിദ്യാര്‍ത്ഥികള്‍ക്ക് വീണ്ടും പരീക്ഷ നടത്തിയത്. ഛത്തീസ്ഗഡ്, ഗുജറാത്ത്, ഹരിയാന, മേഘാലയ, കേന്ദ്രഭരണ പ്രദേശമായ ചണ്ഡീഗഡ് എന്നിവിടങ്ങളിലെ ഏഴ് കേന്ദ്രങ്ങളിലാണ് ഇന്ന് പരീക്ഷ നടന്നത്.മെയ് 5 ന് നടന്ന പരീക്ഷയില്‍ ഗ്രേസ് മാര്‍ക്ക് ലഭിച്ച 1563 ഉദ്യോഗാര്‍ഥികളുടെ ഫലം റദ്ദാക്കിയിരുന്നു. 

അവര്‍ക്ക് വേണ്ടിയാണ് ഇന്ന് പരീക്ഷ നടത്തിയത്. ജൂണ്‍ 30 ന് ഫലം പ്രഖ്യാപിക്കും. എന്‍.ടി.എ നടത്തിയ പരീക്ഷകളില്‍ തുടരെ ക്രമക്കേടുകള്‍ കണ്ടെത്തിയതിനെ തുടര്‍ന്ന് നാഷണല്‍ ടെസ്റ്റിങ് ഏജന്‍സി തലവന്‍ സുബോദ് കുമാര്‍ സിങ്ങിനെ പദവിയില്‍ നിന്ന് നീക്കി. പ്രദീപ് സിങ് കരോളക്ക് എന്‍.ടി.എ ഡയറക്ടറുടെ താല്‍ക്കാലിക ചുമതല നല്‍കിയിട്ടുണ്ട്.