മെച്ചപ്പെട്ട 4ജി, 5ജി സേവനങ്ങള്‍ ലഭ്യമാക്കാന്‍ ബി.എസ്.എന്‍.എല്‍ ഓവര്‍ ദ എയര്‍ (ഒ.ടി.എ), യൂണിവേഴ്‌സല്‍ സിമ്മുകള്‍ പുറത്തിറക്കാന്‍ പദ്ധതിയിടുന്നു. ഉപഭോക്താക്കളെ നിലവിലെ സിം കാര്‍ഡ് മാറ്റാതെ 4ജി, 5ജി സേവനങ്ങള്‍ ഉപയോഗിക്കാന്‍ അനുവദിക്കുന്ന സംവിധാനമാണ് യൂണിവേഴ്‌സല്‍ സിം കാര്‍ഡിലുള്ളത്. അതായത് യൂണിവേഴ്‌സല്‍ സിം കാര്‍ഡുണ്ടെങ്കില്‍ ബി.എസ്.എന്‍.എല്‍ 4ജി, 5ജി സേവനങ്ങള്‍ ആരംഭിക്കുന്ന മുറയ്ക്ക് ഉപയോക്താവിന് അത് ലഭ്യമാകും. ഇതിനായി പുതിയ സിം കാര്‍ഡ് വാങ്ങേണ്ടതില്ല.  ഓവര്‍ ദ എയര്‍ ഫീച്ചര്‍ ഉപയോഗിച്ച് ഉപയോക്താക്കള്‍ക്ക് ബി.എസ്.എന്‍.എല്ലിന്റെ ഓഫീസുകളിലെത്താതെ തന്നെ 4ജി, 5ജി സേവനങ്ങള്‍ ഉപയോഗിക്കാം.

സാമ്പത്തിക പ്രതിസന്ധിയിലായിരുന്ന ബി.എസ്.എന്‍.എല്‍ ഇന്ന് തിരിച്ചുവരവിന്റെ പാതയിലാണ്. പൊതുമേഖലാ സ്ഥാപനത്തെ രക്ഷിക്കാനായി മൂന്ന് രക്ഷാ പാക്കേജുകളാണ് കേന്ദ്രം പ്രഖ്യാപിച്ചത്. 2019ല്‍ 69,000 കോടി രൂപയും 2022ല്‍ 1.64 ലക്ഷം കോടി രൂപയും അവസാന ഘട്ടമായി 89,047 കോടി രൂപയും ഇതിനായി അനുവദിച്ചിരുന്നു. കേന്ദ്രസര്‍ക്കാരിന്റെ ഭാഗത്ത് നിന്നും മികച്ച പിന്തുണ ലഭിച്ചതും, അപ്രതീക്ഷിതമായി സ്വകാര്യ കമ്പനികള്‍ നിരക്കുകള്‍ കൂട്ടിയതുമാണ് ബി.എസ്.എന്‍.എല്ലിന് ശക്തമായ തിരിച്ചു വരവിനുള്ള കളമൊരുക്കിയത്. സ്വകാര്യ കമ്പനികളുടെ സിം കാര്‍ഡ് ഉപേക്ഷിച്ച് ബി.എസ്.എന്‍.എല്ലിലേക്ക് തിരികെ എത്തിയത് ലക്ഷക്കണക്കിനാളുകളാണ്.

പരീക്ഷണാടിസ്ഥാനത്തില്‍ കേരളത്തിലടക്കം ഇന്ത്യയിലെ പല സ്ഥലങ്ങളിലും ബി.എസ്.എന്‍.എല്‍ 4ജി സേവനങ്ങള്‍ തുടങ്ങിയിട്ടുണ്ട്. വയനാട്ടില്‍ ദുരന്തത്തിന്റെ പശ്ചാതലത്തില്‍ ചൂരല്‍മലയില്‍ ബി.എസ്.എന്‍.എല്‍ ഇതിനോടകം 4ജി സര്‍വീസ് തുടങ്ങി. രാജ്യത്തെ 15,000 ടവറുകളിലാണ് നിലവില്‍ 4ജി സര്‍വീസുകള്‍ ലഭ്യമായിട്ടുള്ളത്. ഇന്ത്യന്‍ നിര്‍മിച്ച സാങ്കേതിക വിദ്യയിലാണ് ബി.എസ്.എന്‍.എല്‍ 4ജി സേവനങ്ങള്‍ ഒരുക്കുന്നതെന്നും ശ്രദ്ധേയമാണ്. ഇപ്പോള്‍ ഇന്ത്യയിലെ പല സ്ഥലങ്ങളിലും പരീക്ഷണം നടത്തുന്ന 5ജി സേവനങ്ങള്‍ അടുത്ത വര്‍ഷം തന്നെ ഇന്ത്യയൊട്ടാകെ വ്യാപിപ്പിക്കുമെന്നും ബി.എസ്.എന്‍.എല്‍ വൃത്തങ്ങള്‍ വ്യക്തമാക്കി.

BSNL is gearing up for a major revamp with plans to launch 4G services this year and 5G next year. Learn more about the state-owned telecom operator's strategy to regain its market share and improve its network infrastructure.