മലപ്പുറം:സ്വകാര്യ മേഖലയിലുള്ള ആംബുലൻസുകളിൽ 3376 എണ്ണത്തിന് നിരത്തിലിറങ്ങാൻ ഫിറ്റ്‌നസ് സർട്ടിഫിക്കറ്റില്ലെന്ന് ട്രാൻസ്‌പോർട്ട് ഡയരക്ടറുടെ കണ്ടെത്തൽ. ആശുപത്രികളിൽ ആംബുലൻസുകളുടെ കുറവ് നികത്തുന്നതിന്റെ ഭാഗമായാണ് സ്വകാര്യമേഖലയിലുള്ളവരുടെ എണ്ണവും സർവിസും പരിശോധിച്ച് റിപ്പോർട്ട് തയാറാക്കിയത്.

 സ്വകാര്യമേഖലയിൽ 9883 എണ്ണമാണ് രജിസ്റ്റർ ചെയ്തിട്ടുള്ളത്. ഇവയിൽ വാഹൻ പോർട്ടറിൽ രജിസ്റ്റർ ചെയ്ത് നിരത്തിലിറങ്ങാൻ ഫിറ്റ്‌നസ് സർട്ടിഫിക്കറ്റ് നേടിയത് 6507എണ്ണം മാത്രം. 3376 എണ്ണം ഫിറ്റ്‌നസ് വാങ്ങിയിട്ടില്ല. ഇവ നിരത്തിലുണ്ടോയെന്ന് പരിശോധിക്കാൻ നിർദേശവും നൽകിയിട്ടുണ്ട്. 

  വിവിധ ജില്ലകളിലെ ആരോഗ്യസ്ഥാപനങ്ങളിൽ 615 ആംബുലൻസുകളുടെ കുറവുണ്ടെന്നാണ് ആരോഗ്യവകുപ്പ് കണ്ടെത്തിയത്. എറണാകുളം, തൃശൂർ, പാലക്കാട്, ആലപ്പുഴ ജില്ലകളിലാണ് ഏറ്റവും കുറവുള്ളത്. എറണാകുളത്ത് 79, തൃശൂർ, പാലക്കാട് 78, ആലപ്പുഴ 70 എണ്ണത്തിൻ്റേയും കുറവുണ്ട്. മറ്റു ജില്ലകളിലെ കുറവ്. തിരുവനന്തപുരം 21, കൊല്ലം 31, പത്തനംതിട്ട 20, കോട്ടയം 27, ഇടുക്കി 21, മലപ്പുറം 40, കോഴിക്കോട് 42, വയനാട് 23, കണ്ണൂർ 42, കാസർകോട് 43.

തദ്ദേശ സ്ഥാപനങ്ങളുടെ ഉടമസ്ഥതതയിലുള്ളത് 798 ആണ് വിവിധ ആശുപത്രികളിലുള്ളത്. ഇവയിൽ 229 എണ്ണം ഗ്രാമപഞ്ചായത്തുകളുടേയും 19 എണ്ണം ബ്ലോക്ക് പഞ്ചായത്തുകളുടേയും, 40 എണ്ണം നഗരസഭകളുടേയും ഉടമസ്ഥതയിലുള്ളതാണ്. പ്രൈമറി ഹെൽത്ത് സെന്ററുകളുടെ ഉടമസ്ഥതയിലും 189വും 127 എണ്ണം കമ്യൂണിറ്റി ഹെൽത്ത് സെന്ററുകളുടേയും 178 താലൂക്ക്, ജനറൽ ജില്ലാ ആശുപത്രികളുടേയും ഉടമസ്ഥതയിലുമാണുള്ളത്.