മുംബൈ: മഹാരാഷ്ട്ര നിയമസഭ തെരഞ്ഞെടുപ്പ് ഫലം കാത്തിരിക്കെ കുതിരക്കച്ചവട ഭീതിയിലാണ് കോണ്‍ഗ്രസ്. നാലുശതമാനം വരെ പോളിങ് ശതമാനം ഉയര്‍ന്നത് സംസ്ഥാനത്ത് ഭരണവിരുദ്ധ വികാരം കാണിക്കുന്നതാണെന്നും, അതിനാല്‍ തന്നെ ഇത്തവണ അധികാരം നേടാമെന്നുമുള്ള ആത്മവിശ്വാസത്തിലാണ് കോണ്‍ഗ്രസ് അടങ്ങുന്ന പ്രതിപക്ഷ സഖ്യം. എന്നാല്‍ മുന്‍കാല അനുഭവങ്ങള്‍ കൂട്ടിവായിക്കുമ്പോള്‍ എം.എല്‍.എമാരെ ചാക്കിട്ട് പിടിക്കാന്‍ ബി.ജെ.പി സഖ്യം ഇറങ്ങുമെന്ന ഭീതിയാണ് കോണ്‍ഗ്രസിന്. 

മഹാരാഷ്ട്രയില്‍ ഇതിന് മുമ്പും കോണ്‍ഗ്രസ് എം.എല്‍.എമാര്‍ കൂറുമാറിയ ചരിത്രം തന്നെയാണ് ഇതിന് കാരണം. ഈ പ്രതിസന്ധി തരണം ചെയ്യാന്‍ കോണ്‍ഗ്രസിന്റെ സ്വാധീന മേഖലയായ വിദര്‍ഭയിലെ എം.എല്‍.എമാരെ സുരക്ഷിത സ്ഥലത്തെത്തിക്കാനുള്ള നീക്കത്തിലാണ് പാര്‍ട്ടി. ഇതിനായി പ്രതിപക്ഷ നേതാവ് വിജയ് വടെട്ടിവാറിന് പാര്‍ട്ടി നിര്‍ദേശം നല്‍കുകയും ചെയ്തിട്ടുണ്ട്. ഇതുകൂടാതെ സ്വതന്ത്ര സ്ഥാനാര്‍ഥികളുമായി ആശയ വിനിമയം നടത്താനും പാര്‍ട്ടി വടെട്ടിവാറിനെ ചുമതലയേല്‍പ്പിച്ചിട്ടുണ്ട്. വിദര്‍ഭയിലെ 62 സീറ്റുകളില്‍ 35 മുതല്‍ 40 വരെ സീറ്റുകളിലാണ് കോണ്‍ഗ്രസിന് പ്രതീക്ഷയുള്ളത്. 

അതേസമയം തിരഞ്ഞെടുപ്പിന് മുന്‍പ് പുറത്തുവന്ന എക്‌സിറ്റ് പോളുകള്‍ കോണ്‍ഗ്രസ് അടങ്ങുന്ന മഹാവികാസ് അഘാഡിക്ക് ആശാവഹമല്ല. ഭൂരിഭാഗം എക്‌സിറ്റ് പോളുകളും ബിജെപി സഖ്യമായ മഹായുതി സഖ്യം അധികാരം നിലനിര്‍ത്തുമെന്നാണ് പ്രവചിച്ചിട്ടുള്ളത്. ചാണക്യയും ന്യൂസ് എക്‌സും മഹായുതി 150 സീറ്റുകള്‍ കടക്കുമെന്ന് പ്രവചിച്ചിട്ടുണ്ട്. പീപ്പിള്‍സ് പള്‍സ് 175ന് മുകളിലും സീറ്റുകളാണ് ബിജെപി സഖ്യത്തിന് പ്രതീക്ഷിക്കുന്നത്. മഹാവികാസ് അഘാഡി രണ്ടക്കത്തില്‍ ഒതുങ്ങുമെന്നുമാണ് പ്രവചനം.

maharashtra election result congress try to protect MLAs