കണ്ണൂര്‍: തോട്ടട ഐ.ടി.ഐ സംഘര്‍ഷത്തില്‍ പ്രതിഷേധിച്ച് കണ്ണൂര്‍ ജില്ലയില്‍ നാളെ കെ.എസ്.യു പഠിപ്പ് മുടക്ക്. സംസ്ഥാന വ്യാപക പ്രതിഷേധത്തിനും ആഹ്വാനമുണ്ട്. കാമ്പസിനകത്ത് കെ.എസ്.യു യൂണിറ്റ് രൂപീകരിച്ചതിന് പിന്നാലെയുണ്ടായ എസ്.എഫ്.ഐ ആക്രമണത്തില്‍ പ്രതിഷേധിച്ചാണ് പഠിപ്പ് മുടക്ക്. 

34 വര്‍ഷങ്ങള്‍ക്ക് ശേഷമാണ് കണ്ണൂര്‍ തോട്ടട ഐ.ടി.ഐയില്‍ കെ.എസ്.യു യൂണിറ്റ് രൂപീകരിച്ചത്. ഇതേതുടര്‍ന്ന് സ്ഥാപിച്ച കൊടിമരം എസ്.എഫ്.ഐ പ്രവര്‍ത്തകര്‍ പിഴുതുമാറ്റിയെന്നാണ് കെ.എസ്.യു ആരോപണം. സംഭവത്തില്‍ കെ.എസ്.യു ജില്ല പ്രസിഡന്റ് അതുലും, സംസ്ഥാന നേതാവായ ഫര്‍ഹാന്‍ മുണ്ടേരിയുമടക്കമുള്ള നേതാക്കള്‍ പ്രിന്‍സിപ്പലിനെ കണ്ട് പരാതി നല്‍കാന്‍ കോളജ് കാമ്പസിലെത്തിയിരുന്നു. തുടര്‍ന്ന് ഇവര്‍ കാമ്പസിനകത്ത് കൊടിമരം പുനസ്ഥാപിക്കുകയും, പ്രിന്‍സിപ്പലിനോട് സംസാരിക്കാന്‍ അവസരമൊരുക്കണമെന്ന് പൊലിസിനോട് ആവശ്യപ്പെടുകയും ചെയ്തു. 

എന്നാല്‍ പോകുംവഴി എസ്.എഫ്.ഐ പ്രവര്‍ത്തകര്‍ ഇവരെ തടയുകയും, പ്രവര്‍ത്തകര്‍ തമ്മില്‍ വാക്കേറ്റവുമുണ്ടായി. തുടര്‍ന്നുണ്ടായ സംഘര്‍ഷത്തില്‍ നിരവധി വിദ്യാര്‍ഥികള്‍ക്ക് ക്രൂര മര്‍ദ്ദനമേറ്റതായാണ് പരാതി. നിലവില്‍ കോളജ് അനിശ്ചിതകാലത്തേക്ക് അടച്ചു. വെള്ളിയാഴ്ച്ച സര്‍വകക്ഷി യോഗം വിളിക്കുമെന്ന് പൊലിസ് അറിയിച്ചു. 

Thottada ITI conflict KSU study strike tomorrow in Kannur district