തിരുന്നാവായ: പൊലിസ് കോൺസ്‌റ്റബിൾ ഡ്രൈവർ പരീക്ഷയെ തുടർന്ന് ഫിസിക്കൽ ടെസ്‌റ്റ് ജയിച്ച് ഡ്രൈവിങ് ടെസ്റ്റിന് യോഗ്യത നേടിയ ഉദ്യോഗാർഥികൾ ടെസ്റ്റ് വിജയിക്കാൻ പാടുപെടുന്നു. ഡ്രൈവിങ് ടെസ്‌റ്റിൽ 'ടി'യുടെ അളവ് 26-‐25 അടി ആയിരുന്നത്, പുതിയ സർക്കുലർ പ്രകാരം 20-25 അടി ആക്കി കുറച്ച് ടെസ്‌റ്റ് നടത്തുന്നതാണ് ഉദ്യോഗാർഥികളെ വലയ്ക്കുന്നത്. 
210 ഇഞ്ച് വീൽബേസുള്ള വാഹനങ്ങൾക്കാണ് 'ടി' യുടെ അളവ് 20-25 ആക്കി സർക്കുലറിൽ നിശ്ചയിച്ചിട്ടുള്ളത്.

വീൽബേസ് കൂടുന്നതനുസരിച്ച് 'ടി'യുടെ അളവിൽ മാറ്റം വരുത്തണമെന്നും സർക്കുലറിലുണ്ട്. എന്നാൽ ഇത് പരിഗണിക്കാതെ എല്ലാ വാഹനങ്ങൾക്കും ഒരേ അളവ് നിശ്ചയിക്കുന്നതാണ് ഉദ്യോഗാർഥികളെ കുഴക്കുന്നത്. മോട്ടോർ വാഹന വകുപ്പിലെ സർക്കുലർ പ്രകാരമുള്ള  അളവിലാണ് ടെസ്റ്റ് നടത്തുന്നത് എന്നാണ് പി.എസ്.സിയുടെ വാദം.

ഫയർമാൻ ഡ്രൈവർ, കേരഫെഡ് ഡ്രൈവർ തുടങ്ങിയ എല്ലാ ടെസ്റ്റുകളിലും ഇതുതന്നെയാണ് സ്ഥിതി. ഈ ടെസ്റ്റുകൾക്ക് നൽകുന്ന വാഹനം കെ.എസ്.ആർ.ടി.സിയുടെ ലോങ് ചേസിസ് വാഹനമായ ബസ് ആണെന്നാണ്  പരാതി. ഇതിന്റെ വീൽബേസ് 248.6 ഇഞ്ച് ആണ്. ഈ വാഹനത്തിന് അനുസരിച്ച് 'ടി'യുടെ അളവ് മാറ്റാതെ ടെസ്‌റ്റ് നടത്തുന്നതാണ് പ്രശ്നം.

 പ്രായോഗിക പരീക്ഷ തുടങ്ങും മുൻപു ട്രയൽ എടുക്കുന്ന കെ.എസ്.ആർ.ടിസി ഡ്രൈവർപോലും മൂന്ന് തവണ ശ്രമിച്ചാണ് കഴിഞ്ഞ ഫയർമാൻ ഡ്രൈവർ, കേരഫെഡ് ഡ്രൈവർ തസ്‌തികകളിൽ 'ടി 'ടെസ്‌റ്റ് എടുത്തു കാണിച്ചതെന്നാണ് ഉദ്യോഗാർഥികൾ പറയുന്നത്. ഈ സാഹചര്യത്തിൽ സർക്കുലറിൽ പറയുന്ന പ്രകാരം അളവ് ക്രമീകരിച്ച് ടെസ്‌റ്റ് നടത്തണമെന്ന ആവശ്യമാണ് ഉയർന്ന് വന്നിട്ടുള്ളത്.