റിയാദ്: 2026 ഫിഫ ലോകകപ്പ് വിജയിക്കാൻ സാധ്യതയുള്ള മൂന്ന് ടീമുകൾ ഏതൊക്കെയാണെന്ന് പറഞ്ഞിരിക്കുകയാണ് ബ്രസീലിയൻ സൂപ്പർതാരം നെയ്മർ. ഫ്രാൻസ്, അർജന്റീന, സ്‌പെയ്ൻ എന്നീ ടീമുകളെയാണ് നെയ്മർ തെരഞ്ഞെടുത്തത്. ജിംഗ ബോണിറ്റോക്ക് നൽകിയ അഭിമുഖത്തിലാണ് നെയ്മർ ഇക്കാര്യം പറഞ്ഞത്. 

'ബ്രസീൽ ഒഴികെ ലോകകപ്പ് നേടാൻ സാധിക്കുന്ന മൂന്ന് രാജ്യങ്ങൾ ഏതൊക്കെയാണെന്ന് ചോദിച്ചാൽ ഫ്രാൻസും സ്‌പെയിനും അർജൻ്റീനയും ആണെന്ന് ഞാൻ കരുതുന്നു. കാരണം അർജന്റീന വളരെ ആത്മവിശ്വാസത്തിലാണ്. ഈ മൂന്ന് ടീമുകളും വളരെ മുകളിലാണ്. ഇംഗ്ലണ്ടും ജർമ്മനിക്കും സാധ്യതകൾ ഉണ്ട്,' നെയ്മർ പറഞ്ഞു. 

2022 ഖത്തർ ലോകകപ്പ് വിജയിച്ച അർജന്റീന ലോകകപ്പ് നിലനിർത്താൻ സാധ്യതയുള്ള ടീം തന്നെയാണ്. സമീപകാലങ്ങളിൽ അർജന്റീന മികച്ച ഫോമിലാണ് ഉള്ളത്. നിലവിലെ കോപ്പ അമേരിക്ക ജേതാക്കളും അർജന്റീന തന്നെയാണ്. കഴിഞ്ഞ രണ്ട് ലോകകപ്പുകളിൽ തകർപ്പൻ പ്രകടനങ്ങളാണ് ഫ്രാൻസ് നടത്തിയത്. 2018 ലോകകപ്പ് സ്വന്തമാക്കിയ ഫ്രഞ്ച് പട കഴിഞ്ഞ ലോകകപ്പിൽ ഫൈനൽ വരെ എത്തിയിരുന്നു. 2024 യൂറോ കപ്പിൽ സെമി ഫൈനൽ വരെ എത്താനെ ഫ്രാൻസിന് സാധിച്ചുള്ളൂ. 

സ്പെയ്നും നിലവിൽ മികച്ച ഫുട്ബോൾ ആണ് കളിച്ചുകൊണ്ടിരിക്കുന്നത്. നിലവിലെ യൂറോകപ്പ് ചാമ്പ്യന്മാരും സ്പാനിഷ് പട തന്നെയാണ്. 2024 യൂറോ കപ്പിൽ ഇംഗ്ലണ്ടിനെ വീഴ്ത്തിയാണ് സ്‌പെയ്ൻ കിരീടം ചൂടിയത്. സ്‌പെയിനിന്റെ നാലാം യൂറോ കിരീടം ആണിത്. യൂറോ കപ്പിന്റെ ചരിത്രത്തിൽ ഏറ്റവും കൂടുതൽ കിരീടങ്ങൾ നേടിയ ടീമും സ്‌പെയ്ൻ തന്നെയാണ്.