ദുബൈ: ഗസ്സയില്‍ വെടിനിര്‍ത്തല്‍ വന്നതിനു പിന്നാലെ ആഭ്യന്തര, അന്താരാഷ്ട്ര വിഷയങ്ങള്‍ ചര്‍ച്ചചെയ്യുന്നതിന്റെ ഭാഗമായി യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാനും വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമും കൂടിക്കാഴ്ച നടത്തി.

അല്‍ഐനിലെ ഖസര്‍ അല്‍ റൌദയില്‍ വെച്ചായിരുന്നു കൂടിക്കാഴ്ച. വൈസ് പ്രസിഡന്റും ഉപപ്രധാനമന്ത്രിയും പ്രസിഡന്‍ഷ്യല്‍ കോര്‍ട്ട് ചെയര്‍മാനുമായ ഷെയ്ഖ് മന്‍സൂര്‍ ബിന്‍ സായിദ് അല്‍ നഹ്യാന്‍ ഇരുനേതാക്കാളെയും സ്വീകരിച്ചു. ലോകരാഷ്ട്രങ്ങള്‍ക്കിടയില്‍ കരുത്തനായി മാറാനുള്ള വികസന അജണ്ടകളും അടുത്ത ഘട്ടത്തില്‍ ദേശീയ ലക്ഷ്യങ്ങള്‍ കൈവരിക്കുന്നതിനുള്ള തന്ത്രങ്ങളും ഇരുനേതാക്കളും പരിശോധിച്ചു. 

ഭരണാധികാരിയുടെ അല്‍ഐന്‍ മേഖലാ പ്രതിനിധി ഷെയ്ഖ് ഹസ്സ ബിന്‍ സായിദ് അല്‍ നഹ്യാന്‍, പ്രസിഡന്‍ഷ്യല്‍ കോര്‍ട്ട് ഫോര്‍ സ്‌പെഷ്യല്‍ അഫയേഴ്‌സ് ഡെപ്യൂട്ടി ചെയര്‍മാന്‍ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ സായിദ് അല്‍ നഹ്യാന്‍, ദുബൈ സിവില്‍ ഏവിയേഷന്‍ അതോറിറ്റി ചെയര്‍മാനും ദുബൈ എയര്‍പോര്‍ട്ടിന്റെയും എമിറേറ്റ്‌സ് ഗ്രൂപ്പിന്റെയും ചെയര്‍മാനും ചീഫ് എക്‌സിക്യൂട്ടീവുമായ ഷെയ്ഖ് അഹമ്മദ് ബിന്‍ സഈദ് അല്‍ മക്തൂം, പ്രസിഡന്റിന്റെ ഉപദേഷ്ടാവ് ഷെയ്ഖ് മുഹമ്മദ് ബിന്‍ ഹമദ് ബിന്‍ തഹ്നൂന്‍ അല്‍ നഹ്യാന്‍ തുടങ്ങിയവരും കൂടിക്കാഴ്ചയുടെ ഭാഗമായിരുന്നു.