പാലക്കാട്: രേഖകളില്ലാതെ ട്രെയിനിൽ കടത്തിക്കൊണ്ടുവന്ന 18,46,000 രൂപ പിടികൂടി. തമിഴ്നാട് സ്വദേശിയായ മുഹമ്മദ് അബ്ദുൾ റഹിമാൻ (28) ആണ് പാലക്കാട് ജങ്ഷൻ റെയിൽവേ സ്റ്റേഷനിൽ വെച്ച് ആർപിഎഫ് നടത്തിയ പരിശോധനയിൽ അറസ്റ്റിലായത്. തമിഴ്നാട് തിരുനെൽവേലി പുളിയാൻ കുടിയിലാണ് പ്രതിയുടെ സ്വദേശം.

വിദേശ കറൻസി വ്യാപാരത്തിന്റെ ഇടനിലക്കാരനായ മുഹമ്മദ് അബ്ദുൾ റഹിമാൻ ബെംഗളൂരുവിൽ നിന്ന് തിരുവനന്തപുരത്തേക്ക് പണവുമായി പോകുന്നതിനിടയിൽ പാലക്കാട് വെച്ച് പിടിയിലാവുകയായിരുന്നു. അന്വേഷണത്തിനിടെ, പൊലീസ് പരിശോധനയെ ഭയന്ന് തുണികൊണ്ടു നിർമ്മിച്ച പ്രത്യേക ബെൽറ്റിനുള്ളിൽ പണം ഒളിപ്പിച്ച് ട്രെയിനിന്റെ ടോയ്‌ലറ്റിൽ ഒളിച്ചിരിക്കുകയായിരുന്നു പ്രതി.

രഹസ്യ വിവരത്തിന്റെ അടിസ്ഥാനത്തിൽ ആര്‍പിഎഫ്  ട്രെയിനിന്റെ ടോയ്‌ലറ്റുകൾ പരിശോധിച്ചാണ് ഇയാൾ പിടികൂടിയത്. പിടിച്ചെടുത്ത പണവും പ്രതിയെയും തുടർ അന്വേഷണം നടത്തുന്നതിനായി പാലക്കാട് ഇൻകം ടാക്സ് ഇൻവെസ്റ്റിഗേഷൻ അഡീഷണൽ ഡയറക്ടർക്ക് കൈമാറി.