ന്യൂഡല്‍ഹി: കയര്‍ ബോര്‍ഡ് ജീവനക്കാരിയായ ജോളി മധുവിന്റെ മരണത്തില്‍ അന്വേഷണം നടത്താന്‍ സമിതിയെ നിയോഗിച്ച് കേന്ദ്രം. ജോയിന്റ് സെക്രട്ടറി തല ഉദ്യോഗസ്ഥന്റെ നേതൃത്വത്തിലാകും അന്വേഷണം. കൂടാതെ കയര്‍ ബോര്‍ഡിലെ സാമ്പത്തിക ഇടപാടുകളില്‍ പ്രത്യേക അന്വേഷണവും നടത്തും.

ഫെബ്രുവരി 10 നാണ് കേന്ദ്ര സര്‍ക്കാര്‍ സ്ഥാപനമായ കയര്‍ ബോര്‍ഡില്‍ തൊഴില്‍ പീഡന പരാതി ഉന്നയിച്ച ജീവനക്കാരി സെറിബ്രല്‍ ഹെമിറേജ് രോഗ ബാധിതയായി മരിച്ചത്. കൊച്ചി ഓഫിസിലെ സെക്ഷന്‍ ഓഫിസര്‍ ജോളി മധു , ചെയര്‍മാന്‍ ഉള്‍പ്പെടെയുളള കയര്‍ ബോര്‍ഡിലെ ഉന്നതര്‍ക്കെതിരെ മാനസിക പീഡനം ആരോപിച്ചിരുന്നു. 

മുപ്പത് വര്‍ഷത്തോളമായി കയര്‍ബോര്‍ഡിലെ ജീവനക്കാരിയായിരുന്ന ജോളി മധു കാന്‍സര്‍ അതിജീവിതയും ഒപ്പം വിധവയുമായിരുന്നു. ഇതൊന്നും പരിഗണിക്കാതെ ജോളിയെ ആറു മാസം മുമ്പ് ആന്ധ്രാപ്രദേശിലേക്ക് സ്ഥലം മാറ്റുകയായിരുന്നു. രോഗാവസ്ഥ വ്യക്തമാക്കുന്ന മെഡിക്കല്‍ രേഖകള്‍ സമര്‍പ്പിച്ചിട്ടു പോലും പരിഗണിച്ചില്ല. കൂടാതെ ശമ്പളവും തടഞ്ഞുവച്ചുവെന്നും കുടുംബം പറഞ്ഞു.  

തൊഴിലിടത്തിലെ മേലുദ്യോഗസ്ഥരുടെ മാനസിക പീഡനം സഹിക്കാനാവാതെയാണ് ജോളിക്ക് മരണത്തിന് കീഴടങ്ങേണ്ടി വന്നതെന്നായിരുന്നു കുടുംബത്തിന്റെ ആരോപണം. ഇതിലാണ് അന്വേഷണം നടക്കുക.