ദുബൈ: കാലിഫോർണിയയിലെ വാൻഡൻബർഗ് സ്‌പേസ് ഫോഴ്‌സ് ബേസിൽ നിന്ന് ഇത്തിഹാദ് സാറ്റ് ഇന്ന് രാവിലെ 10.39ന് വിക്ഷേപിക്കും. സ്‌പേസ് എക്‌സിന്റെ ഫാൽകൺ 9 റോക്കറ്റിൽ വിക്ഷേപിക്കുന്ന സിന്തറ്റിക് അപർച്ചർ റഡാർ (എസ്.എ.ആർ) ഉപഗ്രഹത്തിന് ഒന്നിലധികം ഇമേജിംഗ് മോഡുകൾ ഉണ്ട്. കൂടാതെ, മുഹമ്മദ് ബിൻ റാഷിദ് സ്‌പേസ് സെന്ററിന്റെ (എം.ബി.ആർ.എസ്‌.സി) ഭൂമി നിരീക്ഷണ ശേഷി വർധിപ്പിക്കാൻ ഇത് മുഖേന സാധിക്കുകയും ചെയ്യും.

യു.എ.ഇ നിവാസികൾക്കും ആഗോള ബഹിരാകാശ പ്രേമികൾക്കും എം.ബി.ആർ.എസ്‌.സിയുടെ ഔദ്യോഗിക വെബ്‌സൈറ്റിൽ തത്സമയ സംപ്രേഷണം വഴി രാവിലെ 10.15 മുതൽ വിക്ഷേപണം കാണാം. കഴിഞ്ഞ മാസം ദുബൈ കിരീടാവകാശി രാജ്യത്തെ ഏറ്റവും പുതിയ ബഹിരാകാശ പദ്ധതിയുടെ പൂർത്തീകരണം പ്രഖ്യാപിച്ചിരുന്നു. ''ബഹിരാകാശ മേഖലയിലെ ഞങ്ങളുടെ അഭിലാഷങ്ങൾക്ക് അതിരുകളില്ല. കൂടാതെ, ബഹിരാകാശ പര്യവേക്ഷണത്തിൽ യു.എ.ഇയുടെ ആഗോള നേതൃത്വത്തെ ശക്തിപ്പെടുത്താനും അറിവും നവീകരണവും ഉപയോഗിച്ച് മനുഷ്യ രാശിയുടെ ശോഭനമായ ഭാവി രൂപപ്പെടുത്താനും യുവാക്കളുടെ കഴിവുകളിൽ ഞങ്ങൾ ഉറച്ചു വിശ്വസിക്കുന്നു'' ദുബൈ കിരീടാവകാശിയും യു.എ.ഇ ഉപ പ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അഭിപ്രായപ്പെട്ടു.

ഉപഗ്രഹത്തിന്റെ പ്രവർത്തനം

ഇത്തിഹാദ് സാറ്റിന്റെ സാങ്കേതിക വിദ്യ എല്ലാ കാലാവസ്ഥയിലും, എല്ലാ ദിവസവും 24 മണിക്കൂറുമുള്ള ഇമേജിംഗോടെ സാധ്യമാകും. എ.ഐ പിന്തുണയുള്ള അതിവേഗ ഡാറ്റ പ്രോസസ്സിംഗ് ഉപയോഗിക്കുന്ന എസ്.എ.ആർ ഉപഗ്രഹം ഈ മേഖലയിലെ ഏറ്റവും ഉയർന്ന റെസല്യൂഷനുകളിൽ ഒന്നാണ്.

മേഘാവൃതം, മൂടൽമഞ്ഞ്, പൊടിക്കാറ്റ് പോലുള്ള പ്രതികൂല കാലാവസ്ഥകൾ കണക്കിലെടുക്കാതെ ഉപഗ്രഹം രാവും പകലും വിശാലമായ പ്രദേശങ്ങൾ സ്കാൻ ചെയ്യുന്നത് തുടരും. ഉപഗ്രഹത്തിന്റെ ഇലക്ട്രോണിക് ഉപ സംവിധാനം ഭൂമിയെ സ്കാൻ ചെയ്യാൻ സഹായിക്കുന്ന റഡാർ തരംഗങ്ങൾ സൃഷ്ടിക്കുന്നു. "പ്രസരണത്തിലും സ്വീകരണത്തിലും കൃത്യത ഉറപ്പാക്കാൻ" ഈ തരംഗങ്ങളുടെ തീവ്രത കൊണ്ട് സിസ്റ്റത്തെ നിയന്ത്രിക്കാൻ സാധിക്കുമെന്ന് എം.ബി.ആർ.എസ്‌.സി പറയുന്നു.

സ്പോട്ട് മോഡ് (ചെറിയ പ്രദേശങ്ങൾക്ക് ഉയർന്ന റെസല്യൂഷൻ ഇമേജിംഗ്), സ്കാൻ മോഡ് (വലിയ പ്രദേശങ്ങൾക്ക് വൈഡ് ഏരിയ കവറേജ്), സ്ട്രിപ് മോഡ് (ദൈർഘ്യമേറിയ പ്രദേശങ്ങൾക്ക് വിപുലീകൃത നിരീക്ഷണം) എന്നീ മൂന്ന് ചിത്രീകരണ ഉപാധികൾ ഈ ഉപഗ്രഹം വാഗ്ദാനം ചെയ്യുന്നു. തരംഗങ്ങളെ കടത്തി വിടുകയും ഭൂമിയിൽ നിന്ന് 'അവയുടെ പ്രതിഫലനം പകർത്തുകയും ചെയ്യുന്ന ഒരു ക്യാമറ ഇതിൽ സജ്ജീകരിച്ചിരിക്കുന്നു.
ദുരന്ത നിവാരണം, എണ്ണച്ചോർച്ച, സസ്യജാല പഠനങ്ങൾ, സമുദ്ര നാവിഗേഷൻ എന്നിവയെക്കുറിച്ച് നന്നായി മനസ്സിലാക്കാനും കൈകാര്യം ചെയ്യാനും ഉപഗ്രഹം സൃഷ്ടിക്കുന്ന ഡാറ്റ സഹായിക്കുമെന്ന് എം.ബി.ആർ.എസ്‌.സിയിലെ എയ്‌റോസ്‌പേസ് എഞ്ചിനീയറിംഗ് സെക്ടർ അസിസ്റ്റന്റ് ഡയരക്ടർ ജനറൽ അമർ അൽ സയീഗ് അൽ ഗാഫിരി പറഞ്ഞു.

 The UAE's space ambitions take a leap forward with the launch of Ittihad Sat, marking a significant milestone in the country's space exploration journey.