തിരുവനന്തപുരം: കേന്ദ്രമന്ത്രിയും സിനിമ നടനുമായ സുരേഷ് ​ഗോപി കഴുത്തിൽ അണിഞ്ഞിരുന്ന പുലിപ്പല്ല് മാലയുമായി ബന്ധപ്പെട്ട പരാതിയിൽ പരാതിക്കാരന്റെ മൊഴി ഇന്ന് രേഖപ്പെടുത്തും. യൂത്ത് കോൺഗ്രസ് നേതാവ് എ.എ. മുഹമ്മദ് ഹാഷിം ആണ് കേസിലെ പരാതിക്കാരൻ. പട്ടിക്കാട് റെയിഞ്ച് ഓഫീസർക്ക് മുന്നിൽ ഹാജരായി മൊഴി നൽകുന്നത്. പുലിപ്പല്ല് മാല ധരിച്ച് നടക്കുന്ന സുരേഷ് ഗോപിയുടെ ദൃശ്യങ്ങൾ സഹിതമാണ് പരാതി നൽകിയിരുന്നത്. തൃശൂർ ഡി.എഫ്.ഒയാകും മൊഴിയെടുക്കുക.

രാവിലെ പത്തരയ്ക്ക്  ഹാജരാകാനാണ് നിർദ്ദേശം നൽകിയിരിക്കുന്നത്. പുലിപ്പല്ല് മാല എങ്ങനെ ലഭിച്ചെന്ന് സുരേഷ് ​ഗോപി വ്യക്തമാക്കണം എന്നാണ് പരാതിക്കാരനായ മുഹമ്മദ് ഹാഷിം നൽകിയ പരാതിയിലെ പ്രധാന ആവശ്യം. സംസ്ഥാന പൊലിസ് മേധാവിക്കാണ് പരാതി നൽകിയിരുന്നത്. വൈൽഡ് ലൈഫ് പ്രൊട്ടക്ഷൻ ആക്ടിന്റെ ലംഘനമാണ് പുലിപ്പല്ല് ഉപയോഗിക്കൽ എന്നാണ് പരാതിയിൽ പറയുന്നത്. അതിനിടെ, സുരേഷ് ഗോപിയുടെ മാലയിലെ പുലിപ്പല്ല് യഥാർഥത്തിലുള്ളതാണോ എന്ന അന്വേഷണം പൊലിസ് നടത്തുന്നുണ്ട്. 

ALSO READ: ഇതുവരെ ലോക്‌സഭയിലെത്തിയത് 18 മുസ്‍ലിം വനിതകൾ മാത്രം; 13 പേർ എത്തിയത് കുടുംബത്തിലെ പിൻഗാമികളായി

തൃശ്ശൂരിലെ പൊതു ചടങ്ങിൽ സുരേഷ് ഗോപി പുലിപ്പല്ലുളള മാല അണിഞ്ഞ് പങ്കെടുത്തു എന്നാണ് പരാതിയിൽ പറയുന്നത്. പുലിപ്പല്ലാണെങ്കിൽ വന്യജീവി സംരക്ഷണ നിയമത്തിന്റെ ലംഘനമായി കണക്കാക്കി കേസെടുക്കും.

കേസിലെ പരാതിക്കാരനായ മുഹമ്മദ് ഹാഷിം ഐഎൻടിയുസി യുവജനവിഭാഗം സംസ്ഥാന ജനറൽ സെക്രട്ടറിയാണ്. യൂത്ത് കോൺഗ്രസ് മുൻ ദേശീയ വക്താവുമായിരുന്നു ഇദ്ദേഹം. പുലിപ്പല്ലുമാല ഉപയോഗിച്ചെന്ന കേസിൽ റാപ്പർ വേടൻ എന്ന ഹിരൺ ദാസ് മുരളിക്കെതിരെ കേസെടുത്തതിന് പിന്നാലെയാണ് സുരേഷ് ഗോപിക്കെതിരെയും പരാതി ഉയർന്നത്.