വാഷിംഗ്ടൺ: ചാർളി കിർക്കിനെ കൊലപ്പെടുത്തിയ പ്രതിയെ പൊലിസ് കസ്റ്റഡിയിലെടുത്തതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു. 22 കാരനായ ടെയ്‍ലർ റോബിൻസൺ എന്ന വ്യക്തിയാണ് പിടിയിലായത്. റിപ്പോർട്ടുകൾ പ്രകാരം അക്രമി സ്വമേധയാ കീഴടങ്ങിയതാണ്. കൊലയാളിക്ക് വധശിക്ഷ നൽകണമെന്ന് ഡൊണാൾഡ് ട്രംപ് ആവശ്യപ്പെട്ടു. 

കൊലപാതകം നടന്ന് ഇരുപത്തിനാലു മണിക്കൂറിനുള്ളിലാണ് പ്രതി പിടിയിലായത്. ടെയ്‍ലർ റോബിൻസന്റെ പിതാവും ഒരു പുരോഹിതനും അദ്ദേഹത്തെ സ്റ്റേഷനിൽ എത്തിക്കുന്നതിൽ സഹായിച്ചതായി റിപ്പോർട്ടുണ്ട്. "വളരെ അടുപ്പമുള്ള ഒരാൾ" എഫ്ബിഐയെയും മറ്റ് ഏജൻസികളെയും സംശയിക്കുന്നയാളിലേക്ക് നയിച്ചു എന്നാണ് സംഭവത്തെ കുറിച്ച് ട്രംപ് പറഞ്ഞു.

ALSO READ: കൊല്ലപ്പെട്ട വലതുപക്ഷ പ്രചാരകന്‍ ചാര്‍ളി കിര്‍ക്കിന് പരമോന്നത സിവിലിയന്‍ ബഹുമതി സമ്മാനിക്കും: ഡൊണാള്‍ഡ് ട്രംപ്

എഫ്ബിഐ പുറത്തുവിട്ട ഫോട്ടോകളിലുള്ളത് സംശയിക്കപ്പെടുന്നയാൾ തന്നെയാണെന്നും അദ്ദേഹം പറഞ്ഞു. പ്രതിയെ കണ്ടെത്തുന്നതിനുളള വിവരങ്ങൾ നൽകുന്നവർക്ക് 100,000 ഡോളർ പാരിതോഷികം പ്രഖ്യാപിച്ചതിന് ശേഷം 7,000 ത്തിലധികം ആളുകൾ സൂചനകൾ നൽകിയതായി ഉദ്യോഗസ്ഥർ പറഞ്ഞു.

യൂട്ടവാലി സർവകലാശാലയിലെ ചടങ്ങിനിടെയാണ് ട്രംപിന്റെ അനുയായിയും തീവ്ര വലതുപക്ഷവാദിയുമായ ചാർളി കിർക്കിനു നേർക്ക് വെടിയുതിർക്കുന്നത്. സർവകലാശാലയിലെ ഒരു വിദ്യാർഥിയുടെ ചോദ്യത്തിന് മറുപടി നൽകവെയാണ് വെടിവെപ്പുണ്ടായത്. കഴുത്തിന് വെടിയേറ്റ അദ്ദേഹം വൈകാതെ മരിക്കുകയായിരുന്നു.

ALSO READ: വലതുപക്ഷ പ്രവർത്തകനും ട്രംപിന്റെ അനുയായിയുമായ ചാർളി കിർക്ക് വെടിയേറ്റ് കൊല്ലപ്പെട്ടു

ഫലസ്തീൻ മുതൽ ഇന്ത്യ വരെയുള്ള വിവിധ വിഷയങ്ങളിൽ വിവാദപരമായ വീക്ഷണങ്ങൾ പുലർത്തിയിരുന്ന ഒരു യാഥാസ്ഥിതികനായിരുന്നു ചാർളി കിർക്ക്. അതിനാൽ തന്നെ നടന്നത് രാഷ്ട്രീയ ആക്രമണമായിരിക്കാമെന്ന് പലരും വിലയിരുത്തിയിരുന്നു. എങ്കിലും ആക്രമിയുടെ ഉദ്ദേശ്യം ഇതുവരെ വ്യക്തമല്ല.