‍ 

ബെംഗളൂരു:  ഡിജിറ്റൽ അറസ്റ്റിന്റെ പേരിൽ ബെംഗളൂരുവിൽ നിന്നുള്ള രണ്ട് സ്ത്രീകളെ 9 മണിക്കൂറോളം ന​ഗ്നരാക്കി നിർത്തി തട്ടിപ്പ് ക്രൂരത.  മുംബൈയിലെ കൊളാബ എന്ന സ്ഥലത്തെ പൊലിസ് സ്റ്റേഷനിൽ നിന്നുള്ള ഉദ്യോഗസ്ഥനാണെന്ന് പറഞ്ഞാണ് തട്ടിപ്പുകാർ സ്ത്രീകളെ ചൂഷണത്തിനിരയാക്കിയത്. ഡിജിറ്റൽ അറസ്റ്റാണെന്നും ഓൺലൈൻ വൈദ്യപരിശോധനയ്ക്ക് വിധേയമാകണമെന്ന് പറഞ്ഞ് നഗ്നരാകാൻ നിർബന്ധിക്കുകയായിരുന്നു. തിരിച്ചറിയാൻ എന്ന വ്യാജേന ജന്മനായുള്ള അടയാളങ്ങളും മറുകുകളും കാണിക്കാനും ഈ സമയം തട്ടിപ്പുകാരൻ സ്ത്രീകളുടെ വീഡിയോകളും ഫോട്ടോകളും റെക്കോർഡ് ചെയ്തതായി വാർത്താ ഏജൻസിയായ പിടിഐ റിപ്പോർട്ട് ചെയ്തു.

ജൂലൈ 17-നാണ് സംഭവം. 46-കാരിയായ സ്ത്രീയും അവരുടെ സുഹൃത്തും യോഗ പരിശീലകയുമാണ് ഈ തട്ടിപ്പിന് ഇരയായത്. തട്ടിപ്പുകാർ ഇവർക്കെതിരെ ജെറ്റ് എയർവേയ്‌സ് കള്ളപ്പണം വെളുപ്പിക്കൽ കേസുമായി ബന്ധമുണ്ടെന്ന് ആരോപിക്കുകയായിരുന്നു. വ്യാജ സിബിഐ ഐഡി കാർഡുകളും അറസ്റ്റ് വാറണ്ടുകളും കാണിച്ച് വിശ്വാസ്യത നേടിയ തട്ടിപ്പുകാർ, സ്ത്രീകളെ വീട്ടിൽനിന്ന് പുറത്തിറങ്ങാനും അനുവദിച്ചില്ല. ഒമ്പത് മണിക്കൂറോളമാണ് വീഡിയോ കോൾ ഭീഷണിയിൽ നിൽക്കേണ്ടി വന്നത്.

'വെരിഫിക്കേഷൻ' ആവശ്യങ്ങൾക്കായി ഒരു പ്രത്യേക അക്കൗണ്ടിലേക്ക് പണം ട്രാൻസ്ഫർ ചെയ്യാൻ ആവശ്യപ്പെട്ട തട്ടിപ്പുകാർ, തുക മുഴുവൻ തിരികെ നൽകുമെന്ന് വാഗ്ദാനം ചെയ്തു. ഇതിന്റെ ഭാഗമായി, യോഗ പരിശീലക കൂടിയായ സുഹൃത്ത് 58,447 രൂപ തട്ടിപ്പുകാർക്ക് കൈമാറി. തുടർന്ന്, 'മെഡിക്കൽ ക്ലിയറൻസ്' എന്ന വ്യാജേന, ശരീരത്തിലെ അടയാളങ്ങളും ടാറ്റൂകളും പരിശോധിക്കാൻ എന്ന പേര് പറഞ്ഞ് സ്ത്രീകളെ നഗ്നരാകാൻ നിർബന്ധിച്ചു. ഇതിനിടെ, ഇവർ റെക്കോർഡ് ചെയ്യപ്പെടുന്നുണ്ടെന്ന് സ്ത്രീകൾക്ക് അറിയില്ലായിരുന്നു.

ഒമ്പത് മണിക്കൂർ നീണ്ട ഡിജിറ്റൽ വിചാരണയ്ക്ക് ശേഷം, യോഗ പരിശീലക വേറൊരു സുഹൃത്തിനെ വാട്ട്‌സ്ആപ്പ് വഴി ബന്ധപ്പെടുകയും കോൾ വിച്ഛേദിക്കുകയുമായിരുന്നു. തുടർന്ന്, തട്ടിപ്പുകാർ ബന്ധപ്പെടാൻ ശ്രമിച്ചെങ്കിലും വിജയിച്ചില്ല. എന്നാൽ, റെക്കോർഡ് ചെയ്ത ചിത്രങ്ങളും വീഡിയോകളും പരസ്യമാക്കുമെന്ന് ഭീഷണിപ്പെടുത്തി അവർ സ്ത്രീകൾക്ക് പകർത്തിയ ദൃശ്യങ്ങൾ അയക്കുകയായിരുന്നു. കഴിഞ്ഞ ശനിയാഴ്ച ഈസ്റ്റ് സിഇഎൻ പൊലിസ് സ്റ്റേഷനിൽ പരാതി നൽകി.

ഇൻഫർമേഷൻ ടെക്നോളജി ആക്ട്, ഭാരതീയ ന്യായ സംഹിത (ബിഎൻഎസ്) എന്നിവ പ്രകാരം കേസ് രജിസ്റ്റർ ചെയ്ത് തട്ടിപ്പുകാരെ കണ്ടെത്താൻ പൊലിസ് അന്വേഷണം ആരംഭിച്ചു. ഡിജിറ്റൽ അറസ്റ്റ് തട്ടിപ്പുകളെക്കുറിച്ച് ജനങ്ങൾ ജാഗ്രത പാലിക്കണമെന്ന് പൊലിസ് മുന്നറിയിപ്പ് നൽകി.

In Bengaluru, two women were subjected to a nine-hour 'digital arrest' scam where fraudsters, posing as Mumbai police, coerced them into stripping during a video call for a fake "online medical check." The scammers, alleging money laundering, recorded the victims and extorted ₹58,447. A police complaint has been filed, and an investigation is underway