മോസ്‌കോ: റഷ്യയിലെ കാംചത്ക മേഖലയിലെ കിഴക്കന്‍ തീരത്തിന് സമീപം ഭൂചലനം. റിക്ടര്‍ സ്‌കെയിലില്‍ 7.4 തീവ്രത രേഖപ്പെടുത്തിയ ശക്തമായ ഭൂകമ്പമാണ് ഉണ്ടായതെന്ന് യുഎസ് ജിയോളജിക്കല്‍ സര്‍വേ അറിയിച്ചു. പസഫികില്‍ സുനാമി മുന്നറിയിപ്പ് നല്‍കിയിട്ടുണ്ട്. ഇതുവരെ ആളപായമോ നാശനഷ്ടങ്ങളോ റിപ്പോര്‍ട്ട് ചെയ്യപ്പെട്ടിട്ടില്ല. 

റഷ്യന്‍ നഗരമായ പെട്രോപാവ്‌ലോവ്‌സ്‌ക്-കാംചത്സ്‌കിയില്‍ നിന്ന് 111 കിലോമീറ്റര്‍ (69 മൈല്‍) കിഴക്ക് 39.5 കിലോമീറ്റര്‍ താഴ്ചയിലാണ് ഭൂകമ്പത്തിന്റെ പ്രഭവകേന്ദ്രം. സമീപത്തുള്ള ചില റഷ്യന്‍ തീരങ്ങളില്‍ ഒരു മീറ്റര്‍(3.3 അടി) വരെ ഉയരത്തില്‍ അപകടകരമായ തിരമാലകള്‍ക്കും സാധ്യതയുള്ളതായി മുന്നറിയിപ്പുണ്ട്. 

കഴിഞ്ഞ ജൂലൈയില്‍ പസഫിക് സമുദ്രത്തില്‍ 8.8 തീവ്രത രേഖപ്പെടുത്തിയ ഭൂചലനം അനുഭവപ്പെട്ട അതേ പ്രദേശത്താണ് ഇത്തവണയും ഭൂചലനമുണ്ടായത്. അന്ന് റഷ്യയുള്‍പ്പെടെ യു.എസ്, ജപ്പാന്‍, ചിലി എന്നിവിടങ്ങളില്‍ സുനാമി മുന്നിറിയിപ്പ് നല്‍കിയിരുന്നു. റഷ്യയില്‍ ഇതുവരെ രേഖപ്പെടുത്തിയതില്‍ വച്ച് ആറാമത്തെ ഏറ്റവും വലിയ ഭൂകമ്പമാണ് ഇതെന്ന് യു.എസ് ജിയോളജിക്കല്‍ സര്‍വേ വ്യക്തമാക്കിയിരുന്നു. 

ഭൂകമ്പ സാധ്യതയുള്ള മേഖലയാണ് കാംചത്ക. ഈ വര്‍ഷം ജൂലൈ ആദ്യം പെട്രോപാവ്ലോവ്സ്‌ക്-കംചത്സ്‌കിയില്‍ നിന്ന് 144 കിലോമീറ്റര്‍ അകലെ 7.4 തീവ്രതയുള്ള ഭൂകമ്പം ഉള്‍പ്പെടെ അഞ്ച് പ്രധാന ഭൂകമ്പങ്ങള്‍ ഈ മേഖലയില്‍ അനുഭവപ്പെട്ടിരുന്നു.