മോസ്‌കോ/ വാഷിങ്ടൺ: ഇന്ത്യയും റഷ്യയും തമ്മിലുള്ള വ്യാപാര ബന്ധം പൊളിക്കാൻ നികുതി ഭീഷണിയുമായി യു.എസ് പ്രസിഡന്റ് ഡൊണാൾഡ് ട്രംപ്. റഷ്യയിൽനിന്ന് എണ്ണ വാങ്ങുന്നത് തുടരുന്ന ബ്രസീൽ, ഇന്ത്യ, ചൈന രാജ്യങ്ങൾക്ക് വൻ നികുതി ചുമത്തുമെന്ന് യു.എസ് നേരത്തെ മുന്നറിയിപ്പ് നൽകിയിരുന്നു. ഇന്ത്യക്ക്  25 % നികുതി പ്രഖ്യാപിക്കുകയും ചെയ്തു. എന്നാലിപ്പോൾ, റഷ്യയിൽനിന്ന്  എണ്ണ വാങ്ങുന്നത് നിർത്തിയില്ലെങ്കിൽ 10 ശതമാനം അധികച്ചുങ്കം കൂടി ഏർപ്പെടുത്താനാണ് ട്രംപിന്റെ നീക്കം. യു.എസ് നികുതി പ്രഖ്യാപിച്ചതിനു പിന്നാലെ ഇന്ത്യൻ പൊതുമേഖലാ എണ്ണക്കമ്പനികൾ റഷ്യൻ എണ്ണ വാങ്ങുന്നത് നിർത്തിയെന്ന് വാർത്തവന്നെങ്കിലും പിന്നീട് കേന്ദ്ര സർക്കാർ ഈ റിപ്പോർട്ട് നിഷേധിച്ചു. വാർത്തയോട് ട്രംപ് പ്രതികരിച്ച ശേഷമാണ് വാർത്ത ഇന്ത്യ തള്ളിയത്.

ഉക്രൈൻ യുദ്ധത്തിന്  പണമുണ്ടാക്കാൻ റഷ്യ എണ്ണ വ്യാപാരത്തെ ഉപയോഗിക്കുകയാണെന്നാണ് യു.എസ് ആരോപണം. ഉക്രൈൻ യുദ്ധത്തിനു പിന്നാലെ റഷ്യക്ക് ഉപരോധം ശക്തമാക്കിയതോടെ റഷ്യൻ എണ്ണ വാങ്ങാൻ മറ്റു രാജ്യങ്ങൾ തയാറായില്ല. റഷ്യയുടെ എണ്ണ വിപണിയിൽ കരിനിഴൽ വീണപ്പോഴാണ് ഇന്ത്യ റഷ്യയിൽ നിന്ന് കൂടുതൽ എണ്ണ വാങ്ങാൻ തയാറായത്. 

ഉക്രൈൻ യുദ്ധത്തിനു മുൻപ് 0.2 ശതമാനം എണ്ണയാണ് ഇന്ത്യ റഷ്യയിൽ നിന്ന് ഇറക്കുമതി ചെയ്തിരുന്നത്. ഉക്രൈൻ യുദ്ധം തുടങ്ങിയതോടെ പ്രതിസന്ധിയിലായ റഷ്യയുടെ എണ്ണ വലിയ തോതിൽ വാങ്ങി ഇന്ത്യ റഷ്യയെ സഹായിച്ചു. കുറഞ്ഞ നിരക്കിൽ എണ്ണ റഷ്യയിൽനിന്ന് ഇന്ത്യക്ക് ലഭിക്കാനും തുടങ്ങി. ശീതയുദ്ധം മുതൽ ഇന്ത്യയും റഷ്യയും എല്ലാരംഗത്തും ബന്ധം ശക്തമാണ്. ഉക്രൈൻ യുദ്ധത്തിന് ശേഷം ഇന്ത്യ ഇറക്കുമതി ചെയ്യുന്ന റഷ്യൻ എണ്ണ 41 ശതമാനമാക്കി വർധിപ്പിച്ചിരുന്നു. ഇറാഖ് (20 %), സഊദി അറേബ്യ (11%) രാജ്യങ്ങളിൽ നിന്നും ഇന്ത്യ എണ്ണ വാങ്ങുന്നുണ്ട്. 2023 മെയ് മാസത്തിൽ 21.5 ലക്ഷം ബാരൽ ക്രൂഡ് ഓയിലാണ് ഇന്ത്യ ഒരു ദിവസം റഷ്യയിൽ നിന്ന് വാങ്ങിയിരുന്നത്. 

ജി-7, യൂറോപ്യൻ, ആസ്‌ത്രേലിയൻ ക്രൂഡ് ഓയിൽ വില ബാരലിന് 60 ഡോളറായിരിക്കുമ്പോൾ  റഷ്യൻ എണ്ണയ്ക്ക് 40 ഡോളറേ വിലയുള്ളൂ. ഒരു ബാരലിൽ തന്നെ 20 ഡോളർ ലാഭമുണ്ട്. ഈ ലാഭവും വർഷങ്ങളായുള്ള ബന്ധവും ഉപേക്ഷിച്ച് ട്രംപിനു മുന്നിൽ ഇന്ത്യ വഴങ്ങില്ലെന്നാണ് സൂചന.