ന്യൂഡല്‍ഹി: വോട്ടര്‍പട്ടികയിലെ ക്രമക്കേട് ആരോപിച്ച് കേന്ദ്ര തെരഞ്ഞെടുപ്പ് കമ്മിഷന്‍ ഓഫിസിലേക്ക് ഇന്‍ഡ്യ സഖ്യത്തിലെ എം.പിമാര്‍ നടത്തിയ പ്രതിഷേധ മാര്‍ച്ചില്‍ സംഘര്‍ഷം. എം.പിമാരുടെ പ്രതിഷേധ മാര്‍ച്ച് ഡല്‍ഹി പൊലിസ് ബാരിക്കേഡ് വച്ച് തടഞ്ഞു. രാഹുല്‍ ഗാന്ധി ഉള്‍പെടെ എം.പിമാരെ അറസ്റ്റ് ചെയ്ത് നീക്കി. 

പ്രതിഷേധത്തിനിടെ പശ്ചിമ ബംഗാളില്‍ നിന്നുള്ള വനിത എം.പിമാരായ മഹുവ മൊയ്ത്രും മിതാലി ബാഗും റോഡില്‍ കുഴഞ്ഞുവീണു. രാഹുല്‍ ഗാന്ധിയുടെ വാഹനത്തില്‍ ഇവരെ ആശുപത്രിയിലേക്ക് മാറ്റി. കൂടെ സയാനി ഘോഷും പ്രിയ സരോജും ഉണ്ടായിരുന്നു.

വോട്ട് കവര്‍ച്ച, ബിഹാര്‍ വോട്ടര്‍പട്ടിക വിവാദം എന്നിവയിലാണ് ഇന്‍ഡ്യ സഖ്യം എം.പിമാര്‍ തെരഞ്ഞെടുപ്പ് കമ്മിഷന്‍ ആസ്ഥാനത്തേക്ക്് മാര്‍ച്ച് നടത്തുന്നത്. വിഷയത്തില്‍ ആദ്യമായാണ് പ്രതിപക്ഷം ഒറ്റക്കെട്ടായി പ്രതിഷേധത്തിന് ഇറങ്ങുന്നത്. രാവിലെ 11.30ന് രാഹുല്‍ ഗാന്ധിയുടെ നേതൃത്വത്തില്‍ 300ഓളം എം.പിമാര്‍ പാര്‍ലമെന്റില്‍ നിന്നാണ് മാര്‍ച്ച് ആരംഭിച്ചത്. വോട്ട് കൊള്ള അവസാനിപ്പിക്കുക തുടങ്ങിയ മുദ്രാവാക്യങ്ങള്‍ ഉയര്‍ത്തിയാണ് മാര്‍ച്ച്. ലോക്സഭയിലേയും രാജ്യസഭയിലേയും 300ലേറെ എം.പിമാര്‍ മാര്‍ച്ചില്‍ പങ്കെടുത്തു. 

ALSO READ: ഗസ്സ പിടിച്ചെടുക്കാനുള്ള നീക്കത്തില്‍ അന്താരാഷ്ട്രതലത്തില്‍ വിശ്വാസ്യത നഷ്ടപ്പെട്ട് ഇസ്‌റാഈല്‍; ഗസ്സയില്‍ പട്ടിണിക്കിട്ട് കൊന്ന കുഞ്ഞുങ്ങളുടെ എണ്ണം 100 ആയി

 കഴിഞ്ഞവര്‍ഷം ജൂണില്‍ ലോക്‌സഭാ തെരഞ്ഞെടുപ്പ് ഫലം പുറത്തുവന്നതിനുശേഷം ഇന്‍ഡ്യ സഖ്യം പാര്‍ലമെന്റിന് പുറത്ത് സംയുക്തമായി നടത്തുന്ന ആദ്യ പ്രതിഷേധമാണിത്. രാഹുല്‍ ഗാന്ധി തെരഞ്ഞെടുപ്പ് കമ്മിഷനെതിരേ ഉന്നയിച്ച ആരോപണങ്ങള്‍ ഒറ്റക്കെട്ടായി രാജ്യത്താകെ ഉന്നയിക്കുന്നതിന് പ്രതിപക്ഷ കക്ഷികള്‍ക്കിടയില്‍ ധാരണയായിട്ടുണ്ട്. ഓരോ കക്ഷികളും തങ്ങളുടെ സംസ്ഥാനങ്ങളില്‍ സമാനമായ പരിശോധന ആവശ്യപ്പെടും. രാഹുല്‍ ഗാന്ധി തന്റെ വസതിയില്‍ വിളിച്ചുചേര്‍ത്ത നേതാക്കളുടെ യോഗത്തില്‍ വിഷയം ഗൗരവമേറിയതാണെന്ന് നേതാക്കള്‍ പറഞ്ഞിരുന്നു. ആം ആദ്മി പാര്‍ട്ടി, തൃണമൂല്‍ കോണ്‍ഗ്രസ് തുടങ്ങിയ പാര്‍ട്ടികളും ഇടതുപക്ഷവും ഇക്കാര്യത്തില്‍ കോണ്‍ഗ്രസിനൊപ്പം നില്‍ക്കും. സി.പി.എം ജനറല്‍ സെക്രട്ടറി എം.എ ബേബി രാഹുലിന്റെ പോരാട്ടത്തിന് പിന്തുണ പ്രഖ്യാപിച്ചിട്ടുണ്ട്. ഇഷ്ടക്കാരെ നിറച്ച് തെരഞ്ഞെടുപ്പ് കമ്മിഷനെ കേന്ദ്രം നിയന്ത്രിക്കുകയാണെന്നും സി.പി.എം ആരോപിച്ചു. 

അതിനിടെ, വിഷയം ഇന്‍ഡ്യ സഖ്യത്തിന്റെ പ്രധാന അജന്‍ഡയാക്കി മാറ്റാനുള്ള നീക്കവും കോണ്‍ഗ്രസ് ആരംഭിച്ചിട്ടുണ്ട്. ഇതിന്റെ ഭാഗമായി വിഷയം ചര്‍ച്ച ചെയ്യാന്‍ കോണ്‍ഗ്രസ് അധ്യക്ഷനും രാജ്യസഭാ പ്രതിപക്ഷ നേതാവുമായ മല്ലികാര്‍ജുന്‍ ഖാര്‍ഗെ ഇന്‍ഡ്യ സഖ്യം നേതാക്കള്‍ക്ക് ഇന്ന് അത്താഴവിരുന്ന് ഒരുക്കും. 

വോട്ട് മോഷണ വിഷയത്തില്‍ ജനങ്ങളുടെ പിന്തുണ തേടുന്നതിനും വിവരങ്ങള്‍ അറിയിക്കാനും ഡിജിറ്റല്‍ പ്രചാരണത്തിനും കോണ്‍ഗ്രസ് തുടക്കമിട്ടു. ഇതിനായി വോട്ട്‌ചോരി ഡോട്ട് ഇന്‍ എന്ന പേരില്‍ വെബ്‌സൈറ്റ് ആരംഭിച്ചു. വെബ്‌സൈറ്റില്‍ കയറി രജിസ്റ്റര്‍ ചെയ്ത് അതില്‍നിന്ന് ലഭിക്കുന്ന പിന്തുണ മാധ്യമ, സാമൂഹിക മാധ്യമങ്ങളില്‍ പ്രചരിപ്പിക്കാന്‍ കോണ്‍ഗ്രസ് ജനങ്ങളോട് ആഹ്വാനം ചെയ്തു. 9650003420 എന്ന നമ്പറില്‍ മിസ്ഡ് കോള്‍ ചെയ്തും പ്രചാരണത്തില്‍ ചേരാമെന്ന് കോണ്‍ഗ്രസ് വ്യക്തമാക്കി. വോട്ട് മോഷണത്തിന്റെ വിവരങ്ങള്‍ പങ്കുവയ്ക്കാനും സൗകര്യമുണ്ട്. 

ALSO READ: വോട്ട് കൊള്ളക്കെതിരെ പ്രതിഷേധ ജ്വാലയാവാന്‍ ഇന്‍ഡ്യാ സഖ്യം; രാഹുലിന്റെ നേതൃത്വത്തില്‍ മാര്‍ച്ച് ആരംഭിച്ചു, തടയാന്‍ ബാരിക്കേഡുകള്‍ നിരത്തി വന്‍ പൊലിസ് സന്നാഹം

Tensions escalate in Delhi as INDIA alliance MPs march to the Election Commission office over alleged voter list fraud. Police detain Rahul Gandhi and several MPs. TMC leaders Mahua Moitra and Mitali Bag collapse during the protest and are rushed to hospital.