2026 ഐപിഎല്ലിൽ രാജസ്ഥാൻ റോയൽസിൽ നിന്നും സഞ്ജു സാംസൺ മറ്റൊരു ടീമിലേക്ക് പോവുമെന്ന വാർത്തകളാണ് ഇപ്പോൾ ക്രിക്കറ്റ് ആരാധകർക്കിടയിൽ നിലനിൽക്കുന്നത്. രാജസ്ഥാൻ വിടാൻ സഞ്ജു സാംസൺ താത്പര്യം പ്രകടപ്പിച്ചുവെന്നാണ് ക്രിക് ബസ് റിപ്പോർട്ട് ചെയ്തത്. സഞ്ജു രാജസ്ഥാനിൽ തുടരുമെന്ന വാർത്തകൾ കഴിഞ്ഞ ദിവസങ്ങളിൽ പുറത്തുവന്നിരുന്നു. ഇതിന് പിന്നാലെയാണ് തന്നെ ലേലത്തിൽ വിടാൻ രാജസ്ഥനോട് സഞ്ജു ആവശ്യപ്പെട്ടുവെന്ന വാർത്ത പുറത്തു വന്നത്. 

ഇപ്പോൾ ക്രിക്കറ്റിൽ നിന്നും വിരമിക്കുന്നതിന് മുന്നോടിയായി നേടാൻ ആഗ്രഹിക്കുന്ന ഒരു കാര്യത്തെക്കുറിച്ച് തുറന്ന് പറഞ്ഞിരിക്കുകയാണ് സഞ്ജു. ഒരു ഓവറിൽ ആറ് സിക്സുകൾ നേടുകയാണെന്നതാണ് തന്റെ സ്വപ്നമാണെന്നാണ് സഞ്ജു പറഞ്ഞത്. ഇന്ത്യൻ ഇതിഹാസ സ്പിന്നർ ആർ. അശ്വിന്റെ യൂട്യൂബ് ചാനലിലെ ‘കുട്ടി സ്റ്റോറീസ് വിത്ത് ആഷ്’ എന്ന പരിപാടിയിലാണ് സഞ്ജു ഇക്കാര്യം പറഞ്ഞത്. 

കഴിഞ്ഞ വർഷം ബംഗ്ലാദേശിനെതിരെ നടന്ന ടി-20 മത്സരത്തിൽ സഞ്ജു ഒരു ഓവറിൽ അഞ്ച് സിക്സുകൾ നേടിയിരുന്നു. ഈ ഓവറിലെ ഒറ്റ പന്ത് കൂടി സിക്സർ നേടിയിരുന്നെങ്കിൽ സഞ്ജുവിന് ഈ സ്വപ്നം സാക്ഷാത്ക്കരിക്കാൻ സാധിക്കുമായിരുന്നു. ആ മത്സരത്തിൽ സെഞ്ച്വറി നേടിയാണ് സഞ്ജു തിളങ്ങിയത്. 

2015ൽ അന്താരാഷ്ട്ര ക്രിക്കറ്റിൽ അരങ്ങേറിയ സഞ്ജു ടി20യിൽ ഇതുവരെ 42 മത്സരങ്ങളിൽ നിന്നും മൂന്ന് സെഞ്ച്വറികൾ ഉൾപ്പെടെ 681 റൺസ് നേടിയിട്ടുണ്ട്. ടി20യിൽ അരങ്ങേറി പിന്നെയും 6 വർഷം കഴിഞ്ഞാണ് താരം ഏകദിനത്തിൽ അരങ്ങേറ്റം കുറിച്ചത്. 2021 ജൂലൈ 23നാണ് താരം ഏകദിന ക്രിക്കറ്റിൽ അരങ്ങേറിയത്. ഏകദിനത്തിൽ 16 മത്സരങ്ങളിൽ നിന്നായി ഒരു സെഞ്ച്വറിയടക്കം 510 റൺസും താരത്തിന്റെ പേരിലുണ്ട്. 

നിലവിൽ കേരള ക്രിക്കറ്റ് ലീഗ് രണ്ടാം സീസണിനായുള്ള തയ്യാറെടുപ്പിലാണ് സഞ്ജു. താരലേലത്തിൽ സഞ്ജുവിനെ 26.80 ലക്ഷം രൂപയാണ് സഞ്ജുവിന് ലഭിച്ചത്. കൊച്ചി ബ്ലൂ ടൈഗേഴ്‌സ് ആണ് സഞ്ജുവിനെ സ്വന്തമാക്കിയത്. ടൂർണമെന്റിന്റെ ചരിത്രത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന തുകയാണിത്. 

Sanju has opened up about one thing he wants to achieve before retiring from cricket He said that his dream is to hit six sixes in an over