കൊച്ചി: അറബിക്കടല്‍ തീരങ്ങളില്‍ തിമിംഗലങ്ങള്‍ ചത്ത് കരയ്ക്കടിയുന്നത് വർദ്ധിക്കുന്നു. കഴിഞ്ഞ ദശകത്തിനിടെ പത്ത് മടങ്ങ് വര്‍ധിച്ചതായാണ് കേന്ദ്ര സമുദ്രമത്സ്യ ഗവേഷണ സ്ഥാപന (സിഎംഎഫ്ആര്‍ഐ) നടത്തിയ പഠനം വെളിപ്പെടുത്തുന്നത്. 2004-2013 കാലയളവില്‍ പ്രതിവര്‍ഷം 0.3 ശതമാനമായിരുന്ന തിമിംഗല മരണനിരക്ക് 2013-2023 കാലയളവില്‍ 3 ശതമാനമായി കുത്തനെ ഉയര്‍ന്നു.

കേരളം, കര്‍ണാടക, ഗോവ എന്നിവിടങ്ങളിലെ തീരങ്ങളിലാണ് തിമിംഗലങ്ങള്‍ ഏറ്റവും കൂടുതല്‍ ചത്തടിയുന്നതായി റിപ്പോര്‍ട്ട്. കപ്പല്‍ ഗതാഗതത്തിന്റെ വര്‍ധന, മത്സ്യബന്ധനം, ശബ്ദമലിനീകരണം, ആഴം കുറഞ്ഞ തീരക്കടല്‍, ആവാസവ്യവസ്ഥയുടെ നാശം തുടങ്ങിയവയാണ് ഇതിന് പ്രധാന കാരണങ്ങള്‍. കപ്പല്‍ അപകടങ്ങളും പ്രക്ഷുബ്ധമായ കടലും തിമിംഗലങ്ങളുടെ ജീവന് ഭീഷണി ഉയർത്തുന്നു. സാമൂഹിക മാധ്യമങ്ങളിലൂടെയുള്ള ജനശ്രദ്ധയും ഉയര്‍ന്ന പൗരബോധവും ഇത്തരം സംഭവങ്ങള്‍ വേഗത്തില്‍ റിപ്പോര്‍ട്ട് ചെയ്യാന്‍ സഹായിക്കുന്നുണ്ട്.

ALSO READ: ഞെട്ടിച്ച് നിസാൻ: 5-സ്റ്റാർ സേഫ്റ്റിയും 10 വർഷ വാറണ്ടിയും, അതും 6.14 ലക്ഷത്തിന് കോംപാക്‌ട് എസ്‌യുവിക്ക്

ബ്രൈഡ്‌സ് തിമിംഗലങ്ങളാണ് ഏറ്റവും കൂടുതല്‍ ചത്തടിയുന്നത്. 2023ല്‍ മാത്രം ഒമ്പത് തിമിംഗലങ്ങള്‍ ചത്ത് കരയ്ക്കടിഞ്ഞു, ഇത് കഴിഞ്ഞ 20 വര്‍ഷത്തിനിടയിലെ ഏറ്റവും ഉയര്‍ന്ന നിരക്കാണ്. പ്രത്യേകിച്ച് ആഗസ്ത്-നവംബര്‍ മാസങ്ങളില്‍ മണ്‍സൂണ്‍ കാലത്താണ് ഇത്തരം സംഭവങ്ങള്‍ കൂടുതല്‍.

മണ്‍സൂണിനോടനുബന്ധിച്ച് പടിഞ്ഞാറന്‍ തീരക്കടലുകളിലെ ചെറുമത്സ്യങ്ങളുടെ ഉയര്‍ന്ന ഉല്‍പാദനം നടക്കുന്നു. ഇവയെ ലക്ഷ്യമിട്ട് തീരത്തോട് ചേര്‍ന്ന് നീങ്ങുന്ന തിമിംഗലങ്ങള്‍ ആഴം കുറഞ്ഞ പ്രദേശങ്ങളില്‍ കുടുങ്ങുകയോ കരയ്ക്കടിയുകയോ ചെയ്യുന്നതായാണ് കണ്ടെത്തൽ. കടലിലെ ഉയര്‍ന്ന താപനിലയും ഒഴുക്കുകളും തിമിംഗലങ്ങളെ തീരത്തേക്ക് എത്തിക്കുന്നതില്‍ നിര്‍ണായക പങ്ക് വഹിക്കുന്നു. ഇന്ത്യയിലെ സമുദ്രസസ്തനികളെക്കുറിച്ചുള്ള ദേശീയ ഗവേഷണ പദ്ധതിയുടെ ഭാഗമായി സീനിയര്‍ സയന്റിസ്റ്റ് ഡോ. ആര്‍ രതീഷ്‌കുമാര്‍ നേതൃത്വം നല്‍കിയാണ് ഈ പഠനം നടത്തിയത്. പ്രാദേശികമായി അനുയോജ്യമായ സംരക്ഷണ പദ്ധതികള്‍ അനിവാര്യമാണെന്ന് അദ്ദേഹം വ്യക്തമാക്കി.

ALSO READ: ഇന്നോവ ഹൈക്രോസ് വാങ്ങാൻ കാശ് തികയില്ല? കുറഞ്ഞ വിലയിൽ അതേ ഹൈബ്രിഡ് എഞ്ചിന് ഉള്ള മാരുതിയുടെ ഒരു കാർ ആയാലോ

തത്സമയ മുന്നറിയിപ്പ് സംവിധാനങ്ങളും തിമിംഗല സംരക്ഷണ ശൃംഖലകളും സ്ഥാപിക്കണമെന്ന് പഠനം ശുപാര്‍ശ ചെയ്യുന്നു. മത്സ്യത്തൊഴിലാളികള്‍ക്കും ഉദ്യോഗസ്ഥര്‍ക്കും പരിശീലനം നല്‍കുകയും സിറ്റിസന്‍ സയന്‍സ് വഴി വിവരശേഖരണം ശക്തിപ്പെടുത്തുകയും വേണമെന്ന് പഠനം ചൂണ്ടിക്കാട്ടുന്നു.

ALSO READ: തൃശ്ശൂരിൽ സുരേഷ് ഗോപിയെ വിടാതെ വിവാദങ്ങളുടെ നിര

A recent study reveals a tenfold surge in whale strandings along the Arabian Sea coast, raising concerns about marine ecosystem health and potential environmental factors contributing to the alarming increase