ബ്യൂണസ് അയേഴ്‌സ്: വെനസ്വേലക്കും ഇക്വഡോറിനുമെതിരേയുള്ള അർജന്റീനയുടെ ലോകകപ്പ് യോഗ്യതാ മത്സരങ്ങൾക്കുള്ള ടീം പ്രഖ്യാപിച്ചു. പരിശീലകൻ ലയണൽ സ്‌കലോനിയാണ് 31 അംഗ ടീമിനെ പ്രഖ്യാപിച്ചത്. ഇന്റർ മിയാമി താരം ലയണൽ മെസി ടീമിലേക്ക് തിരിച്ചെത്തി. നിലവിൽ യോഗ്യതാ ഗ്രൂപ്പിൽ ഒന്നാമതെത്തി 2026 ലോകകപ്പിലേക്ക് അർജന്റിന തങ്ങളുടെ സ്ഥാനം ഇതിനകം ഉറപ്പാക്കിയിട്ടുണ്ട്.

മാഞ്ചസ്റ്റർ സിറ്റിയിൽ നിന്നുള്ള ക്ലോഡിയോ എച്ചെവേരി, കോമോയുടെ വളർന്നുവരുന്ന താരം നിക്കോ പാസ് തുടങ്ങിയ യുവ പ്രതിഭകൾ ടീമിൽ ഇടംനേടി. ജൂണിൽ കൊളംബിയയ്‌ക്കെതിരായ മത്സരത്തിൽ ചുവപ്പ് കാർഡ് ലഭിച്ചതിനെത്തുടർന്ന് രണ്ട് മത്സരങ്ങളിൽ സസ്‌പെൻഷൻ ലഭിച്ചതിനാൽ ചെൽസി മിഡ്ഫീൽഡർ എൻസോ ഫെർണാണ്ടസിന് ടീമിൽ ഇടം ലഭിച്ചിട്ടില്ല.

 അലയാൻഡ്രോ ഗാർണാച്ചോക്കും ടീമിലിടം ലഭിച്ചിട്ടില്ല. എമിലിയാനോ മാർട്ടിനെസ് (ആസ്റ്റൺ വില്ല), ജെറോണിമോ റുള്ളി (മാർസെ), വാൾട്ടർ ബെനിറ്റസ് (ക്രിസ്റ്റൽ പാലസ്) എന്നിവരാണ് ടീമിലെ ഗോൾകീപ്പർമാർ.

സെപ്റ്റംബർ നാലിന് ബ്യൂണസ് ഐറിസിലെ മോനുമെൻറൽ സ്റ്റേഡിയത്തിൽ വെനിസ്വേലയേയും പത്തിന് ഗ്വായാക്വിലിൽ ഇക്വഡോറിനേയും അർജൻറീന നേരിടും. ദക്ഷിണ അമേരിക്കൻ മേഖല യോഗ്യതാ റൗണ്ടിൽ 35 പോയിൻറമായി അർജന്റീന ഒന്നാം സ്ഥാനത്താണ് നിൽക്കുന്നത്. രണ്ടാം സ്ഥാനത്തുള്ള ഇക്വഡോറിനേക്കാളും മൂന്നാം സ്ഥാനത്ത് ബ്രസീലിനേക്കാളും 10 പോയിന്റ് മുന്നിലാണ്. ഉടൻ തന്നെ ദേശീയ ക്യാംപിന് തുടക്കമാകും

Argentina have announced their 31-man squad for their World Cup qualifiers against Venezuela and Ecuador Coach Lionel Scaloni named the squad which includes Inter Miami star Lionel Messi