കോഴിക്കോട്: കോഴിക്കോട് നിന്നും ജിദ്ദയിലേക്കും മുംബൈയിലേക്കും ഡൽഹിയിലേക്കും ആകാശ എയർ സർവീസ് നടത്തുമെന്ന് കോഴിക്കോട് എംപിയും കോൺ​ഗ്രസ് നേതാവുമായ എം.കെ രാഘവൻ. ഒക്‌ടോബർ 1 മുതൽ കോഴിക്കോട്-മുംബൈ സർവീസ് ആരംഭിക്കുമെന്നും അധികം താമസിയാതെ തന്നെ കൂടുതൽ ആഭ്യന്തര അന്താരാഷ്ട്ര സർവീസുകളും ആരംഭിക്കുമെന്ന് എയർലൈൻ അധികൃതർ അറിയിച്ചതായും അദ്ദേഹം വ്യക്തമാക്കി. 

ALSO READ: കരിപ്പൂര്‍ ദുരന്തം നടന്ന് അഞ്ചുവര്‍ഷത്തിന് ശേഷം കോഴിക്കോട് സെക്ടറില്‍ സൗദി എയര്‍ലൈന്‍സ് സര്‍വിസ് പുനരാരംഭിക്കുന്നു; ഹജ്ജ് ടെന്‍ഡറിലും പങ്കെടുത്തേക്കും | Kozhikode To Riyadh Flights 

എം.കെ രാഘവന്റെ ഫേസ്ബുക്കിന്റെ പൂർണരൂപം

പ്രിയപ്പെട്ട കോഴിക്കോട്ടുകാർക്കൊപ്പം മറ്റൊരു സന്തോഷ വാർത്ത കൂടി പങ്കുവെക്കുന്നതിൽ അഭിമാനമുണ്ട്.

കോഴിക്കോടിന്റെ ആകാശത്തിന് പുതിയ ചിറകുകൾ നൽകി, ഇന്ത്യയിലെ നവാഗത എയർലൈനായ 'ആകാശ എയർ' കോഴിക്കോടേക്ക് എത്തുകയാണ്. ഏറെ നാളത്തെ ഒട്ടൊരു നല്ല പരിശ്രമം വിജയം നേടുന്നതിന്റെ സന്തോഷം അനല്പമാണ്.

ഒക്‌ടോബർ 1 മുതൽ കോഴിക്കോട്-മുംബൈ സർവീസ് ആരംഭിക്കും. അധികം താമസിയാതെ, സമീപഭാവിയിൽ തന്നെ കൂടുതൽ ആഭ്യന്തര അന്താരാഷ്ട്ര സർവീസുകളും ആരംഭിക്കുമെന്ന് എയർലൈൻ ഒഫീഷ്യൽസ് അറിയിച്ചിട്ടുണ്ട്. കോഴിക്കോട്-ജിദ്ദ റൂട്ടിൽ സർവീസ് ഉണ്ടാകും. ഡൽഹിയിലെ രണ്ടാമത്തെ എയർപോർട്ടായ ഗാസിയാബാദ് ഹിൻഡൺ എയർപോർട്ടിലേക്ക് ഓപ്പറേഷൻ വിപുലപ്പെടുത്തുമ്പോൾ കോഴിക്കോട് - ഡൽഹി സർവീസും ആരംഭിക്കും. കുവൈറ്റ്, ദോഹ, അബുദാബി, ബാംഗ്ലൂർ, തിരുവനന്തപുരം റൂട്ടുകളിലേക്കും സർവീസ് നടത്തണമെന്ന് ആവശ്യമുന്നയിച്ചിട്ടുണ്ട്.

രാജ്യത്തെ അതിവേഗം വളരുന്ന എയർലൈനായ 'ആകാശ എയറിനെ' കോഴിക്കോട് എത്തിക്കാനുള്ള ശ്രമങ്ങൾ എയർലൈൻ ഓപ്പറേഷൻ ആരംഭിച്ചപ്പോൾ മുതൽ തന്നെ നടത്തിയിരുന്നു. നെറ്റ്‌വർക്ക് വിപുലീകരിക്കുമ്പോൾ കോഴിക്കോടിനെ പരിഗണിക്കുമെന്നായിരുന്നു 'ആകാശ' അധികൃതരുടെ ആദ്യ മറുപടി.

19 മാസം കൊണ്ട് 20 എയർക്രാഫ്റ്റുകൾ നേടിയെടുത്ത എയർലൈൻ, 22 ആഭ്യന്തര ഡെസ്റ്റിനേഷനുകൾക്ക് ശേഷം വിവിധ ജി.സി.സി രാജ്യങ്ങളിലായി 5 അന്താരാഷ്ട്ര ഡെസ്റ്റിനേഷനുകൾ കൂടെ ഓപ്പറേഷൻ വിപുലീകരിച്ച ഘട്ടത്തിൽ വീണ്ടും 'ആകാശ' അധികൃതരുമായി നേരിട്ട് ചർച്ചകൾ നടത്തി.

എയർലൈൻ ഡെപ്യൂട്ടി ജന. മാനേജറും കമ്പനിയുടെ എയ്‌റോ പൊളിറ്റിക്കൽ അഫയേഴ്‌സ് ഇൻ ചാർജുമായ പ്രതീക് ശർമ്മയുമായി 2024 ജൂലൈയിൽ ഡൽഹിയിൽ നടത്തിയ ചർച്ച ശുഭകരമായ നീക്കമായി. അദ്ദേഹത്തിന്റെ നിർദേശമനുസരിച്ച് ആകാശ എയർലൈൻ ചീഫ് ഓഫ് ഗവേണൻസ് ആൻഡ് സ്ട്രാറ്റജിക്ക് അക്വിസിഷൻ ശ്രീമതി. പ്രിയ മെഹ്‌റക്ക് വിശദമായ റൂട്ട് റിക്വസ്റ്റ് നൽകി. കൂടാതെ കോഴിക്കോട് എയർപോർട്ടിന്റെ കണക്ടിവിറ്റി പൊട്ടൻഷ്യലിനെ കുറിച്ച് പഠിച്ച് ആകാശ എയർലൈനിന് സഹായകമാകുന്ന രൂപത്തിൽ തയ്യാറാക്കിയ 'Calicut International Airport: Regional Potential, Route Viability and Growth Opportunities' എന്ന റിപ്പോർട്ടും നൽകി.

കൃത്യമായ ഇടവേളകളിൽ സൗത്ത് ഇന്ത്യ ജന. മാനേജർ മുരളി മേനോനും, മാനേജർ സുധീഷ് മംഗലശ്ശേരിയുമായും നിരന്തരം കമ്യൂണിക്കേഷൻ നടത്തി കൊണ്ടിരുന്നു. ഏറെ താല്പര്യത്തോടെ സഹായിച്ച രണ്ടുപേർക്കും കൃതജ്ഞത നേരുന്നു.

'ആകാശ എയർ' കോഴിക്കോട് എത്തുന്നത് കോഴിക്കോടിന് പുതിയ ഊർജ്ജം പകരും. കുറഞ്ഞ കാലം കൊണ്ട് 30 വിമാനങ്ങളും ഫുക്കറ്റ് അടക്കം 29 ഡെസ്റ്റിനേഷനുകളിലായി 50 ലേറെ റൂട്ടുകളിലാണ് 'ആകാശ' ഇപ്പോൾ സർവീസ് നടത്തുന്നത്. എല്ലാ വിമാന കമ്പനികളെയും ഇരു കൈയും നീട്ടി സ്വീകരിച്ച കോഴിക്കോട് 'ആകാശ എയറിനെയും' നിറയെ യാത്രക്കാരുമായി പിന്തുണച്ചിരിക്കും. കോഴിക്കോട് വിമാനത്താവളത്തിന് കൂടുതൽ സന്തോഷ വാർത്തകൾ ഉണ്ടാകാൻ പരിശ്രമിക്കാം... കാതോർക്കാം...

Air connectivity from Kozhikode gets a boost with additional services to Jeddah, Mumbai, and Delhi, offering more options for travelers and expats.