കാസർകോട്: വിദ്യാർത്ഥിയുടെ കർണപടം അടിച്ച് പൊട്ടിച്ച സംഭവത്തിൽ കുണ്ടംകുഴി ജിഎച്ച്എസ്എസ് ഹെഡ്മാസ്റ്റർ എം. അശോകനെ സ്ഥലംമാറ്റി. സ്കൂളിലെ അസംബ്ലിക്കിടെ പത്താം ക്ലാസ് വിദ്യാർത്ഥി ചരൽ കാലുകൊണ്ട് നീക്കിയെന്നു പറഞ്ഞ് കർണപടം അടിച്ച് പൊട്ടിച്ച സംഭവത്തെ തുടർന്നാണ് ഈ നടപടി. ഹെഡ്മാസ്റ്ററെ മഞ്ചേശ്വരം കടമ്പാർ ജിഎച്ച്എസ്എസിലേക്കാണ് സ്ഥലംമാറ്റിയിരിക്കുന്നത്. അന്വേഷണത്തിൽ ഹെഡ്മാസ്റ്ററുടെ ഭാഗത്ത് വീഴ്ച കണ്ടെത്തിയതിനെ തുടർന്നാണ് പൊതുവിദ്യാഭ്യാസ വകുപ്പ് ഈ തീരുമാനം എടുത്തത്.

സംഭവത്തിൽ ഹെഡ്മാസ്റ്റർക്ക് വീഴ്ച പറ്റിയതായി കണ്ടെത്തിയതിനാൽ, ഉടൻ സ്ഥലംമാറ്റം നടപ്പാക്കുമെന്ന് പൊതുവിദ്യാഭ്യാസ മന്ത്രി നേരത്തെ അറിയിച്ചിരുന്നു. കാസർകോട് വിദ്യാഭ്യാസ ഉപഡയറക്ടർ നടത്തിയ അന്വേഷണ റിപ്പോർട്ടിന്റെ അടിസ്ഥാനത്തിലാണ് ഈ നടപടി എടുത്തിരിക്കുന്നത്.

കുണ്ടംകുഴി ജിഎച്ച്എസ്എസിലെ പത്താം ക്ലാസ് വിദ്യാർത്ഥിയാണ് ഹെഡ്മാസ്റ്ററിന്റേ നിന്ന് ക്രൂര മർദനത്തിന് ഇരയായിരിക്കുന്നത്. അസംബ്ലിക്കിടെ വിദ്യാർത്ഥി ചരൽക്കല്ല് കാലുകൊണ്ട് നീക്കിയെന്ന കാരണത്താൽ ഹെഡ്മാസ്റ്റർ കുട്ടിയെ മർദിച്ചതായാണ് റിപ്പോർട്ട്. കുട്ടിയെ അസംബ്ലിക്കിടെ മുന്നിലേക്ക് വിളിച്ച് വരുത്തി ഹെഡ്മാസ്റ്റർ  എല്ലാ വിദ്യാർത്ഥികളുടെയും മുന്നിൽവെച്ച് കോളറിൽ പിടിച്ച് ചെവിയിലും മുഖത്തും അടിച്ചതായി കുട്ടിയുടെ അമ്മ ആരോപിച്ചു.ഈ സംഭവത്തിൽ ബാലാവകാശ കമ്മീഷൻ സ്വമേധയാ കേസെടുത്തിട്ടുണ്ട്.