തിരുവനന്തപുരം: ഗര്‍ഭച്ഛിദ്രത്തിന് നിര്‍ബന്ധിച്ചെന്നാരോപിച്ച് രാഹുല്‍ മാങ്കൂട്ടത്തില്‍ എംഎല്‍എയ്‌ക്കെതിരേ പൊലിസില്‍ പരാതി. ഷിന്റോ സെബാസ്റ്റ്യന്‍ എന്ന അഭിഭാഷകനാണ് എറണാകുളം സെന്‍ട്രല്‍ പൊലിസ് സ്റ്റേഷനില്‍ പരാതി നല്‍കിയത്. ഗര്‍ഭസ്ഥ ശിശുവിന്റെ ജീവിക്കാനുള്ള അവകാശം ലംഘിക്കുന്നതാണെന്ന ചൂണ്ടിക്കാട്ടി വിഷയത്തില്‍ ബാലവകാശ കമ്മീഷന്റെ അടിയന്തര ഇടപെടല്‍ ഉണ്ടാകണമെന്ന് പരാതിക്കാരന്‍ ആവശ്യപ്പെടുന്നു.

രാഹുല്‍ മാങ്കൂട്ടത്തിലും പെണ്‍കുട്ടിയുമായി നടന്ന സംഭാഷണത്തിന്റെ ശബ്ദരേഖയിലൂടെയാണ് രാഹുല്‍ പെണ്‍കുട്ടിയെ ഗര്‍ഭച്ഛിദ്രത്തിന് നിര്‍ബന്ധിച്ച വിവരം പുറത്തറിയുന്നത്.

രാഹുല്‍ മാങ്കൂട്ടത്തിലിനെതിരെ പ്രതിഷേധം കടുപ്പിക്കുകയാണ് ബിജെപിയും സിപിഎമ്മും. രാഹുല്‍ മാങ്കൂട്ടത്തില്‍ എംഎല്‍എ സ്ഥാനവും രാജിവയ്ക്കണമെന്ന് ആവശ്യപ്പെട്ട് സംസ്ഥാനത്തൊട്ടാകെ രാഷ്ട്രീയ, യുവജന സംഘടനകള്‍ സമരം ആരംഭിച്ചു. 

അതേസമയം, യുവനടിയുടേത് ഉള്‍പ്പെടെയുള്ള ആരോപണങ്ങള്‍ക്ക് മറുപടിയുമായി യൂത്ത് കോണ്‍ഗ്രസ് സംസ്ഥാന അധ്യക്ഷന്‍ രാഹുല്‍ മാങ്കൂട്ടത്തില്‍ രംഗത്തെത്തിയിരുന്നു. യൂത്ത് കോണ്‍ഗ്രസ് സംസ്ഥാന പ്രസിഡന്റ് സ്ഥാനത്ത് നിന്ന് മാറാന്‍ തന്നോട് ആരും ആവശ്യപ്പെട്ടിട്ടില്ലെന്ന് പറഞ്ഞ രാഹുല്‍ തനിക്കെതിരെയുള്ള മുഴുവന്‍ ആരോപണങ്ങളെയും തള്ളി. എഐസിസി ഉള്‍പ്പെടെ കേന്ദ്ര നേതൃത്വമോ സംസ്ഥാന നേതൃത്വമോ തന്റെ രാജി ആവശ്യപ്പെട്ടിട്ടില്ലെന്ന് പറഞ്ഞ രാഹുല്‍ മാങ്കൂട്ടത്തില്‍ പിന്നാലെ സ്വയം രാജിവെച്ച് ഒഴിയുകയായിരുന്നു.

പരാതിയുമായി വന്ന യുവനടി അടുത്ത സുഹൃത്താണ്. അവര്‍ ഉന്നയിച്ച കാര്യങ്ങള്‍ തന്നെക്കുറിച്ച് ആണെന്ന് കരുതുന്നില്ലെന്നും രാഹുല്‍ മാങ്കൂട്ടത്തില്‍ അടൂരില്‍ മാധ്യമങ്ങളോട് പ്രതികരിച്ചു. നടിയുടെ പരാതി തന്നെക്കുറിച്ചല്ല. എനിക്കെതിരെ ആരും പരാതി ഉന്നയിച്ചിട്ടില്ല. പരാതി നല്‍കിയാല്‍ കോടതിയില്‍ നേരിടുമെന്നും രാഹുല്‍ പറഞ്ഞു. നിയമപരമായി നിരപരാധിത്വം തെളിയിക്കുമെന്നും രാഹുല്‍ പറഞ്ഞു.